Қозоғистоннинг Актау шаҳри яқинида "Озарбайжон Ҳаво Йўллари" компаниясига тегишли йўловчи самолёти ҳалокатга учради. Самолёт Бокудан Грознийга кетаётган бўлган.

Суриянинг Россиядаги элчиси Башар ал-Жафарийнинг айтишича, ҳокимиятдан ағдарилган Башар Асад даврида Сурияда бирор бир режим эмас, балки коррупция ва мафия тизими ҳукмронлик қилган. Элчи, шунингдек, Сурияда зулм тугаб, янги давр бошланганини таъкидлади.

2025 йил 1 январдан Ўзбекистон ва Қозоғистон БРИКС ташкилоти билан ҳамкорлик мақомини расман қўлга киритади. Бу ушбу мамлакатларга БРИКС тадбирларида ва ташкилотнинг турли фаолиятларида ҳамкор давлат сифатида иштирок этиш имконини беради.

Амстердам суди Исроилнинг "Маккаби" футбол клуби мухлисларига қарши кўча тартибсизликлари бўйича ишда антисемитизмни аниқламади. Тартибсизликлар 8 ноябрда Исроил мухлисларининг қўпол хатти-ҳаракатлари — Фаластин байроғини ёқиш, арабларга қарши шиорлар ва транспорт воситаларини ёқиб юборишлари оқибатида келиб чиққан эди.

Покистон ҳаво кучлари Афғонистоннинг Пактика вилоятига бир неча авиазарбалар берди. "Толибон" Мудофаа вазирлиги вакили Иноятуллоҳ Хоразмий ҳужум натижасида вазиристонликлар (Афғонистонга Покистон шимоли-ғарбидаги тоғли ҳудудида қочиб ўтганлар) ва тинч аҳоли вакилларидан қурбонлар борлигини ҳамда "бу қўрқоқлик ҳаракати жавобсиз қолмаслигини" маълум қилди.

Башар Асад режими ағдарилганидан сўнг, бу давлатлар Сурияни қайта тиклаш ва келажакдаги ҳамкорликни кучайтириш учун янги дипломатик алоқаларни ўрнатмоқда. Таъкидлаш жоиз, Сурия пойтахти Дамашқда Туркия ва Қатар давлатлари ўз элчихонасини қайта очди.

Cиёсий тизими аста-секин чириб бораётган Миср фақатгина Ғарб ва Кўрфаз араб давлатларининг узлуксиз молиявий ёрдами билан яшаб қолаётган улкан ҳаракатсиз кучга айланган. Мамлакат қамоқхоналарида шароит ҳамон аянчли, маҳбуслар қийноқ ва шафқатсиз муносабатларга қарши бир неча бор очлик эълон қилишди. Бу йил Ички ишлар вазирлиги қамоқхоналари, Ички хавфсизлик бўлинмалари ва полиция участкаларида 50 дан ортиқ маҳбус вафот этди.

«Толибон» ҳаракатининг расмий вакили Забиҳуллоҳ Мужоҳид «Tolo News» телеканалига берган интервьюсида Афғонистон ва Тожикистон ўртасидаги алоқалар кундан кунга яхшиланиб бораётгани ҳақида сўз очди.

Исроил мудофаа вазири Исраэл Кац баёнотида жорий йил июли охирида Теҳронда ҲАМАС гуруҳи раҳбари Исмоил Ҳаниянинг Исроил томонидан ўлдирилганини тан олди. Шунингдек, вазир Исроилнинг ҲАМАС ва «Ҳизбуллоҳ»ни мағлуб этиш, Эроннинг мудофаа тизимларини йўққа чиқариш ва Хусийчиларга қарши кураш олиб боришини таъкидлади.

Туркиянинг ғарбида жойлашган Караси шаҳрида портловчи моддалар ишлаб чиқарувчи заводда содир бўлган кучли портлаш оқибатида камида 12 киши ҳалок бўлди, яна 3 киши жароҳат олган. Маълум қилинишича, портлаш цехда содир бўлган ва бинога жиддий зарар етказган. Завод тўлиқ вайрон бўлган.