Сурия туризм вазирлиги жамоат пляжларига ташриф буюрувчилар – хоҳ сайёҳ, хоҳ маҳаллий аҳоли вакили бўлишидан қатъий назар жамият ҳис-туйғуларини ҳисобга олиши шартлигини маълум қилди. Унга кўра, пляж ва бошқа жойлар ўртасида ҳаракатланаётганда аёллар чўмилиш костюмлари устидан ёпинчиқ ёки кенг халат кийиши лозим. Эркакларнинг ҳам жамоат жойларида устки кийимсиз юришига рухсат берилмайди.

Сурия собиқ президенти Башар Асад бошқаруви даврида махсус хизматлар тахминан саккиз миллион кишини кузатган, қидирган ёки улар ҳақида маълумот тўплаган. Бу кўрсаткич Сурия халқининг деярли учдан бир қисмини ташкил этади.

Россия махсус хизматлари Асад ва унинг оиласини ҳимоя қилишга алоҳида эътибор қаратмоқда. Тахминларга кўра, хавф Марказий Осиё давлатларидан ўлган ватандошлари учун қасос олмоқчи бўлган одамлардан келиб чиқиши мумкин. Рус матбуоти Асад оиласининг Москвадаги ҳаётини “тақиқланган мавзу” деб ҳисоблаб, ёритмаяпти.

Сурия президенти Аҳмад аш-Шаръ Латакия ва Тартус вилоятларига ташриф буюрди. Бундан бир кун олдин, у Идлиб ва Ҳалаб вилоятларида бўлган эди. Ташриф давомида у камбағалларга ёрдам бериш, иш ҳақларини тўғирлаш ва ички сармояларни рағбатлантириш бўйича режаларини эълон қилди.

Ташриф чоғида президент Сурия инқилобининг оғир йилларида Идлиб аҳолиси мамлакатнинг барча бурчакларидан келган қочқинларга жой берганини ва уларнинг жасорати, ҳамжиҳатлиги ҳамда инсонийликка садоқатини юқори баҳолашини билдирди. Шунингдек, ҳукумат мамлакатдаги қочқинларни ўз уйларига қайтариш ва лагерларни ёпиш учун зарур чораларни кўришга интилаётганини маълум қилди.

Озарбайжон президенти Илҳом Алиев Суриядаги сиёсий ўзгаришлар муносабати билан мамлакатнинг ўтиш даври президенти Аҳмад ал-Шаръга мактуб йўллади. Мактубда Алиев Озарбайжон Сурия билан дўстлик ва ҳамкорлик алоқаларини ривожлантиришга катта аҳамият беришини таъкидлади. Унинг қайд этишича, Озарбайжон Сурияга мазкур муҳим ўтиш даврида зарур ёрдам кўрсатишга тайёр.

Исроил армияси жангчилари Суриянинг Кунейтра вилоятидаги Кудна қишлоғига жойлашаётгани айтилмоқда. Сурия манбалари қўшни Саида қишлоғида ҳам Исроил ҳарбий конвойи пайдо бўлгани, унда 12 та ҳарбий техника ва шахсий таркиб жойлашганини маълум қилган.

Сурия Маориф вазирлиги Шарқий Туркистонлик (уйғурлар) талабаларга бепул таълим берилишини эълон қилди. Энди Шом диёрида ушбу ҳудуддан келган болалар ва ёшлар бошланғич мактабдан тортиб то университетгача ҳеч бир харажатсиз ўқиши мумкин

Сурия Ички ишлар вазири Али Кидда мамлакатда янги миллий хавфсизлик хизмати ташкил этилишини эълон қилди. Таъкидланишича, Янги хавфсизлик хизмати халқаро стандартларга мос равишда фаолият юритади ва инсон ҳуқуқлари, қонун устуворлиги ҳамда адолатни ҳурмат қилишга асосланган тайёргарликдан ўтади.

АҚШнинг БМТдаги элчиси вазифасини бажарувчи Дороти Ши ИШИД маҳбусларини ва Сурия шимоли-шарқидаги ал-Ҳол ва Рож лагерларини бошқариш масаласида АҚШнинг ёрдами доимий давом этолмаслигини билдирди. Шу боис, у мамлакатлардан ўз фуқароларини ватанига қайтаришни сўради.