Бир миллион суриялик қочқин ўз ватанига қайтди

БМТнинг Қочқинлар бўйича агентлигининг маълум қилишича, Башар Асад режими ағдарилганидан кейин хориждан бир миллион суриялик қочқин ўз ватанига қайтган. Агентлик шу муносабат билан ўз юртига қайтаётганларга ёрдам кўрсатиш учун маблағларни кўпайтиришга чақирган.

Бундан ташқари агентлик сўнгги тўққиз ой ичида қарийб 14 йил давом этган фуқаролик уруши сабабли мамлакат ичида кўчирилган яна 1,8 миллион киши ўз шаҳар ва қишлоқларига қайтганини маълум қилган.

Шунга қарамай, қайтиб келаётганлар «катта қийинчиликлар»га дуч келмоқда, дейилади хабарда. Чунки уларнинг бир пайтлари ташлаб кетган уй-жойлари хароб аҳволда, коммунал хизматлар тизими йўқ, иш ўринлари мавжуд эмас, хавфсизлик вазияти эса беқарорлигича қолмоқда.

Агентлик мавжуд маълумотларга таяниб келгуси бир йил ичида қочқинларнинг 80 фоизи уйига қайтишидан умид қилмоқда.