Исроил-ҲАМАС можароси туфайли бугун фаластинликларнинг шафқатсизларча қирилаётгани, ёш гўдаклар, кексалар ва аёлларнинг геноцидга учраётгани Яқин Шарқдаги вазиятни кескинлаштириб юборди. Ҳатто зиддиятга Ливаннинг катта нуфузга эга бўлган “Ҳизбуллоҳ” ҳаракатининг аралашиб қолиш эҳтимолини юзага келтирди. Тўғри, ҳозирча Исроил ва “Ҳизбуллоҳ” ўзаро жанги чегарадош ҳудудларни ўққа тутиш билан чегараланган. Аммо зиддият 2006 йил июлидаги 34 кунлик, Исроилнинг мағлубиятига олиб келган уруш каби кенг қамровли ҳарбий ҳаракатларга олиб келмаслигига ҳеч ким кафолат бермайди. Azon Global сисий таҳлилчи Абдували Сойибназаровнинг бу борадаги мулоҳазаларини эътиборингизга ҳавола этамиз.

Исроил ҳукумати Ливан билан фронтда юзага келиши мумкин бўлган кескинлашувга тайёргарлик кўриш учун қўшимча 50 минг захирадаги ҳарбий хизматчилар чақирувини маъқуллади. Фаол захирадаги аскарларнинг умумий сони шимолда Ливан билан эҳтимолий жангларга тайёргарлик кўриш учун 300 минг нафардан 350 минггача кўтарилди. Ливан билан чегарада Исроил ҳарбий кучлари сони ортиб бормоқда.

Исроилнинг Ливанда кенг кўламли урушни бошлашга тайёрлиги ҳақидаги баёнотлари фонида Қувайт ТИВ раҳбари амирлик фуқароларини "Исроил ва Ҳизбуллоҳ ўртасида қуролли можаро бошланиши хавфи туфайли мамлакатни тезроқ тарк этиш"га чақирди. Қувайтликларни кўчириш учун биринчи борт Байрутга етиб келди. Бунинг учун бир нечта самолётлар сафарбар қилинган.

Исроил 15 июлдан буён Ливан жанубига 5736 маротаба ҳужум уюштириб, 540 га яқин кишининг ўлимига сабабчи бўлди. 1850 киши жароҳатланган. Шунингдек, 1800 гектардан зиёд майдон ёнган, 28 мингга яқин оила хавфсиз ҳудудларга кўчирилган. Исроил томонида ҳам йўқотишлар мавжуд. Хусусан, мамлакат шимолидаги 43 та аҳоли пункти эвакуация қилинган, 1500 дан ортиқ бино, транспорт воситалари ва инфратузилмага зарар етган.

Ливанда 34 кишининг ўлимига ва 3500 га яқин кишининг жароҳатланишига сабаб бўлган пейжерлар ва рацияларнинг портлаши Ҳизбуллоҳ сафларида катта хавфсизлик муаммолари мавжудлигини очиб берди. Ҳаракат ичига портловчи модда ва майда металл шарчалар жойлаштирилган қурилмаларни билвосита МОССАДга тегишли компаниядан сотиб олган.

Исроил армияси охирги 24 соат ичида Ливаннинг турли ҳудудларига ҳаво ҳужумларини уюштиришда давом этмоқда, натижада 94 киши ҳалок бўлди, 168 киши тан жароҳати олди. Ливан ССВ ҳужумлар натижасида жами 748 киши ҳалок бўлганини маълум қилди.

Ливан жанубидаги Қана қишлоғи учинчи бор Исроил армияси томонидан қирғин қилинди. 1996 ва 2006 йилларда бўлгани каби Ғарб матбуоти ушбу қишлоқда ўнлаб тинч аҳоли вакиллари ҳалок бўлганини совуққонлик билан қабул қилмоқда. “Бу эса ирқчи Ғарб медиаси учун сионистларнинг ҳаёти қимматлилиги, араблар эса фақат ўлим кўрсаткичлари янги рекордларни ўрнатгандагина ёритилиши керак бўлган ғайриинсоний мавжудотлар сифатида кўрилишини англатади”, - деб ёзади журналист ва ёзувчи Роберт Инлакеш.

Ливан жанубида сўнгги 24 соат ичида содир бўлган тўқнашувларда камида 25 та исроиллик аскар яраланди. Шунингдек, бир қанча қурбонлар бор, жумладан, “Ҳизбуллоҳ” билан тўқнашув натижасида Исроил армиясининг захирадаги майори, 228-“Алон” бригадасининг 9308-батальони қўмондони ўринбосари Авирам Хариб ҳамда 7338-“Адирим” артиллерия полкидан 27 ёшли Саъар Элиад Наварски ўлган.

Исроилнинг Бейрутга тунги зарбаларидан сўнг Таълим вазирлиги Ливан пойтахтидаги барча мактаб ва олийгоҳларни ёпишга қарор қилди. Исроил тажовузи сабабли шусиз ҳам минглаб ўқувчи-талабалар қочқинларга айланган, мактаблардан эса бошпана сифатида фойдаланиш бошланган эди.