27.01.2025 10:30
239

Ливан ва Исроил ўртасидаги ўт очишни тўхтатиш келишуви узайтирилди

Оқ уйнинг хабар беришича, Ливан ва Исроил ўртасидаги ўт очишни тўхтатиш бўйича АҚШ назорати остидаги келишув яна уч ҳафтага, 2025 йил 18 февралгача узайтирилди.

Маълумотларга кўра, Ливан, Исроил ва АҚШ расмийлари 2023 йил 7 октябрдан кейин қўлга олинган ливанлик маҳбусларни қайтариш масаласида музокаралар ўтказишни режалаштирмоқда.

Шунга қарамай, Исроил армияси Ливан жанубидаги босиб олинган ҳудудлардан ўз қўшинларини олиб чиқишни ҳали ҳам якунламади. Илгариги келишувга кўра, Исроил армияси 26 январгача ўз позицияларини Ливан ҳарбийларига топшириши лозим эди. Бироқ, кечаги ҳужумлар давомида 22 киши ҳалок бўлиб, 124 киши яралангани қайд этилди.

Исроил армияси 24 январь куни ўз қўшинларини тўлиқ олиб чиқиш жараёни режадан кўпроқ вақт талаб қилинишини ва ушбу жараённи якунлаш учун қўшимча вақт зарурлигини таъкидлади.

Эслатиб ўтамиз, Ливан ва Исроил ўртасидаги сулҳ битими 2024 йил 27 ноябрь куни кучга кирган эди. Келишувга мувофиқ, Исроил армияси 60 кун ичида Ливанни тарк этиши керак бўлган. Бироқ, келишув кучга кирганидан бери Исроил отишмалар ва уйларни бузиш каби ҳаракатлар билан сулҳни бузишда давом этмоқда.

Мавзуга алоқадор

© 2024 Azon Global. Барча ҳуқуқлар ҳимояланган.