АҚШда 13 ёшли мусулмон ўқувчи қизга бошини кесиб ташлаш билан таҳдид қилган 51 ёшли ўқитувчи ҳибсга олинди.

АҚШнинг Нью-Жерси штатида масжид имомига ўқотар қуролдан ҳужум қилинди, у оғир тан жароҳати билан касалхонага ётқизилди.

Гарвард университетининг собиқ раҳбари ОТМ ҳудудида Фаластинни қўллаб ўтказилган акциялар ортидан ҳақорат ва ўлим таҳдидларига учраганини билдирди.

Канада бош вазири Жастин Тюрдо мамлакатда исломофобия ҳолатлари ортиб бораётганидан хавотир билдирди. У ҳукумат фуқаролар “ўз уйларида, маҳаллаларида ва ибодат жойларида ўзларини хавфсиз ҳис қилишлари” учун барча зарур саъй-ҳаракатларни амалга оширишини маълум қилди.

АҚШнинг Гарвард университети талабалари олийгоҳ раҳбарияти кампус ва синфхоналарда исломофобия ҳолатлари, жумладан, фаластинлик, араб ва мусулмон талабаларга қарши таҳдид ва ҳужумлар эътиборсиз қолдирилаётгани устидан шикоят йўллади. Талабаларга Америка мусулмонлар юридик жамғармаси кўмак кўрсатмоқда.

Россия президенти ҳузуридаги Инсон ҳуқуқлари кенгаши тижорий ва турар жой биноларидаги намозхоналарни ёпиш ва тақиқлаш масаласини кўриб чиқмоқда. Бунга ушбу намозхоналарнинг аҳолига ноқулайлик туғдираётгани сабаб қилиб кўрсатилмоқда.

АҚШда Берт Жеймс Бейкер исмли шахс Фаластинни қўллаб‑қувватлаб ўтказилган намойишдан қайтаётган америкалик мусулмонларга пичоқ билан ҳужум қилиб, улардан бирини жароҳатлади. Америка-Ислом муносабатлари кенгаши унга нисбатан нафрат билан боғлиқ жиноят бўйича айблов қўйишга чақирди.

Германияда мақсади озчилик мусулмонлар манфаатларини ҳимоя қилишдан иборат бўлган “Хилма хиллик ва уйғониш учун демократик альянс” (DAVA) номли янги сиёсий партия пайдо бўлди.

Австриянинг “Социал Австрия келажаги” (SÖZ) партияси Вена туманларидан бирининг кўчаларини Рамазон муносабати билан безатишни таклиф қилиб чиқди. Бироқ ушбу таклиф бошқа партияларга ёқмади ва сиёсий қарама-қаршиликни келтириб чиқарди. 200 минг мусулмон яшайдиган Венада Ислом 560 минг киши эътиқод қиладиган католик динидан кейинги иккинчи йирик дин ҳисобланади.

Британия ҳукумати “айрим антимусулмон кучларнинг кескинликни келтириб чиқаришига йўл қўймаслик учун” британиялик мусулмонларни ҳимоя қилишга 4 йил давомида 117 миллион фунт стерлинг (тахминан 150 миллион доллар) ажратишга қарор қилди. Янги маблағ масжидлар, мусулмон диний мактаблари ва бошқа жамоат марказларини қўллаб-қувватлашга сарфланади.