-
Ироқ суди ИШИДнинг ўлдирилган етакчиси Абу Бакр ал-Бағдодийнинг биринчи рафиқасини ташкилот фаолиятига алоқадорликда айбдор деб топди ва унга нисбатан ўлим жазосини тайинлади. Аёл жангарилар ўғрилаб келган язидий қизларни ўз уйида сақлаб, уларни саралаган ва жинсий зўравонлик учун эрига тақдим этган. ал-Бағдодийнинг учинчи аёли ва бир қизи эса умрбод қамоқ жазосига ҳукм қилинди.
-
Facebook, Instagram ва WhatsApp эгаси ҳисобланган Meta компанияси «сионист» сўзи ва унинг ҳосилаларини ўз ичига олган постларга нисбатан сиёсатига ўзгартириш киритилишини эълон қилди ва «яҳудийлар» ўрнига «сионизм» сўзи ишлатилган постлар ўчириб ташланиши ҳақида огоҳлантирди. Meta ушбу чекловлар ўзининг яқиндаги "ҳимояланган миллий, ирқий ёки диний хусусиятлар асосларига ҳужумларни тақиқлаш” сиёсатига ҳамоҳанг эканини маълум қилди.
-
Исроил Ғазо секторида босқинчилик ва қирғинбарот урушини бошлаганига 278 кун бўлди. 24 соат давомида Ғазо сектори, Иордан дарёсининг Ғарбий соҳили ҳамда бутун Яқин Шарқ ҳудудида содир бўлган асосий воқеалар.
-
Россия қонунчилигига муҳожирларни мамлакатдан чиқариб юборишга сабаб бўладиган ҳуқуқбузарликлар рўйхатини кенгайтириш режалаштирилмоқда. Жумладан, ички ишлар ва бошқа ҳуқуқни муҳофаза қилиш органлари ходимларининг қонуний буйруқларига бўйсунмаслик, миграция рўйхатидан ўтишда ёлғон маълумотлар тақдим этиш ёки тақиқланган ташкилотлар рамзларини кўрсатиш ҳам депортга сабаб бўлиши мумкин.
-
Ҳиндистон бош вазири Нарендра Моди 8—9 июль кунлари Москвага ташрифи доирасида РФ Қуролли кучлари сафида Украинада уруш олиб бораётган ҳиндистонликларни ортга қайтариш бўйича келишувга эришди. Қайд этилишича, айни пайтда агентлар томонидан юқори лавозимли ишларга таклиф қилиш орқали урушга жўнатилган йигирмага яқин ҳиндистонлик жанг жабҳаларида қолмоқда, 10 нафари ватанга қайтарилган, икки ҳиндистонлик эса урушда ҳалок бўлган.
-
Исроил диаспора ишлари вазири Амихая Шиклининг Франциядаги парламент сайловларида Жордан Барделл ва Марин Ле Пеннинг “Миллий бирлашув” партиясини қўллаб-қувватлагани, ўта ўнглар ғалабаси Исроил манфаатларига хизмат қилиши ҳақидаги баёнотлари французлар етакчиси Эммануэл Макронни ғазаблантирди. Макрон Шиклини мамлакатдаги парламент сайловларига тўғридан-тўғри аралашганликда айблади.
-
Қозоғистоннинг Каспий денгизи яқинидаги “Оймаша” полигони ва Токмак бурни яқинидаги ҳудудларда Марказий Осиёнинг тўрт давлати ҳамда Озарбайжон иштирокида «Бірлестік-2024» қўмондонлик-штаб ўқув машғулотлари бўлиб ўтмоқда. 4 мингга яқин ҳарбий хизматчи ва 700 тагача қурол ва техникалар жалб этиладиган машғулотларда ҳарбийлар, жумладан, “террорчилар томонидан босиб олинган оролни озод қилади” ҳамда “денгиз хавфсизлигини таъминлаш ва инфратузилмани ҳимоя қилиш бўйича амалиётлар ўтказади”.
-
Россия мусулмонлари диний бошқармаси раисининг биринчи ўринбосари, Москва ислом институти ректори, илоҳиёт фанлари доктори Дамир Мухетдинов ниқоб РФ туб мусулмон халқлари учун тарихий анъанавий либос эканини таъкидлаб, Совет Иттифоқидан олдинги даврда татарлар ва Шимолий Кавказ халқлари орасида бу кийим кенг тарқалгани бўйича тарихий далилларни мисол тариқасида келтирди.
-
Германия Вакиллар палатаси ҲАМАСнинг ҳарбий қаноти Ал-Қассам бригадалари ўз видеоларида нишонларини кўрсатиш учун қўллаган қизил тескари учбурчакни тақиқлаш учун овоз берди. Мухолифатчи партиялар ушбу ташаббусни танқид қилиб, бу каби тақиқлар ўринсиз экани, қизил учбурчаклар эса турли ташкилотлар томонидан узоқ йиллардан буён фойдаланиб келинаётгани ва янги тартиб уларни автомат равишда жиноятчига айлантириб қўйишини таъкидлади.
-
АҚШнинг Флорида штатидаги Канаверал бурнидан SpaceX компаниясининг Falcon 9 ракета-ташувчиси ёрдамида Туркиянинг биринчи миллий ва маҳаллий Türksat 6A сунъий йўлдоши муваффақиятли учирилди. Türksat 6A ёрдамида турк сунъий йўлдошлари алоқа хизматларини кўрсатаётган ер юзи аҳолиси сони 3,5 миллирдандан 5 миллирд кишига кўпаяди.