Исроил босқинчилари фаластинликларни кенг миқёсда қирғин қила бошлаганига ҳам бир йил тўлди. 7 октябрь воқеаларидан сўнг бошланган уруш оқибатида 42 мингдан ортиқ фаластинлик, 2 мингдан кўпроқ ливанлик ҳаётдан кўз юмди. Сионистларнинг ваҳшийликлари қисқа вақт ичида бутун дунёнинг диққат-эътиборини тортди. Жаҳон ҳамжамияти уруш жиноятлари ва тинч аҳолининг ўлдирилишига қарши чиқиб, митинглар ва намойишлар ўтказишди. Мазкур воқеалар ортидан халқаро миқёсда адолат, тараққиёт, инсонпарварлик, тенглик ва ҳуқуқ каби тушунчаларни қайта кўриб чиқиш зарурати пайдо бўлди. Биз билган Ғарб аслида ўзини бошқаларга зийнатлаб кўрсатаётганидек эмаслиги, унинг баландпарвоз шиорлари шунчаки чўпчак экани фош бўлиб қолди. 

Бунинг ортидан минглаб одамлар ягона ҳақиқатни англаган ҳолда Ислом динини қабул қила бошлаган бўлса, миллионлаб одамлар Исроил ва унинг ҳамкорларига қарши бош кўтарди. Буларнинг бари бутун бошли халқаро компаниялар, корпорациялар, сиёсий партиялар, университетлар, оммавий шахслар, шоу бизнес вакиллари ва ҳатто Ғарб маҳсулотларига қарши бойкотнинг авж олишига сабаб бўлди. Дарҳақиқат, Ғазо уруши ва унинг кўп ўтмай чегарадош минтақаларга ёйилиши тарихда мисли кўрилмаган резонансни келтириб чиқарди. Шунга қарамай, Ғарбда исломофобия, мусулмонларга қарши кенг кўламдаги информацион урушлар ҳам тўхтамаяпти. Чиндан ҳам бир йиллик уруш маданиятлар, динлар тўқнашуви ва ҳақиқат ғалабаси учун курашга айланиб кетди. 

Ўтган йилнинг охирларида МcDonald’s, Starbucks каби сионистларни қўллаб-қувватловчи компанияларга нисбатан кенг миқёсли бойкот эълон қилинган бўлса, 2024 йилнинг баҳорига келиб, бунинг натижалари – компания эгаларининг катта йўқотишлари бўй кўрсатди. Қолаверса, машҳур университетлар бўйлаб урушга қарши талабалар ҳаракатининг кучайиши сабабли академик бойкот ҳам юзага келди. 

AzonGlobal бундан саккиз ой муқаддам “Бойкотдан фойда йўқ. Аслида ҳам шундайми?” сарлавҳаси остида видеолавҳа тайёрлаганди. Орадан шунча вақт ўтиб, материалда таъкидланган аргумент ва таҳлилий фикрлар тўлақонли ўз тасдиғини топди. 

Жумладан, шу ёзда МcDonald’s, Starbucks компаниялари сотувлар ва даромадларининг пасайганини маълум қилди. Иккала корпорация ҳам йўқотишларнинг асосий сабаби сифатида Исроилнинг Ғазодаги уруши фонида мусулмонларнинг маҳсулотлардан воз кечаётганини тилга оляпти.

МcDonald’s 2020 йилдан буён биринчи марта глобал савдосининг пасайгани, унинг соф фойдаси ўтган йилнинг шу даврига нисбатан 12 фоизга камайганини билдирди. Starbucks эса сешанба куни Шимолий Америка дўконларидаги харидлар 2 фоизга, дунё бўйлаб эса 7 фоизга тушганини эълон қилди. Шунингдек, компаниянинг халқаро даромадлари умумий ҳисобда 23 фоизга пасайиб кетган.

Бойкот ҳаракатларининг салмоқли қисми Яқин Шарқ ҳудудларига тўғри келади. Оқибатда Coca-Cola, КFC ва Starbucks каби йирик брендларга "кучли зарба бериляпти".

Financial Times газетасининг ёзишича, "Миср фуқароларидан тортиб Индонезия аҳолисигача, Саудияликлардан Покистондаги истеъмолчиларгача сионистларни қўллаб-қувватловчи машҳур озиқ-овқат ва ичимлик брендларини рад этяпти".

Нашрга кўра, Ғарб брендларини бойкот қилиш "яқин ўтмишдаги энг кенг тарқалган ҳаракат" бўлиб, бу “ижтимоий кампаниялар қандай қилиб йирик корпорацияларга қаттиқ зарба бериши мумкинлигига мисол бўла олади”.

Американинг Edelman консалтинг компанияси томонидан 15 мамлакатда яшовчи 15 минг истеъмолчи ўртасида ўтказилган сўровномада Исроил маҳсулотларини бойкот қилиш бўйича энг фаол бешта давлатдан учтаси мусулмон мамлакатлари - Саудия Арабистони, БАА ва Индонезия эканлиги маълум бўлди. Кўплаб мусулмонлар яшовчи Ҳиндистон тўртинчи ўринни, Германия эса бешинчи ўринни эгаллади.

Сўровномада қатнашган саудияликларнинг 71 фоизи мазкур брендларни бойкот қилаётганини айтган бўлса, БААда ушбу кўрсаткич 57 фоизни ташкил этган. Индонезия аҳолисининг эса 50 фоиздан ортиғи бойкотларда иштирок этаётгани маълум бўлди.

Ташқи сиёсат бўйича Stimson таҳлил марказининг таъкидлашича, Яқин Шарқда Ғарб брендларини истеъмолчилар томонидан бойкот қилиш "узоқ тарихга эга" бўлиб, "кўпинча сиёсий, диний ва маданий зиддиятларга бориб тақалади".

Исроилга қарши йўналтирилган, зўравонликсиз фаластинликлар бошчилигидаги бойкот, сармояларни чиқариш ва санкциялар ҳаракати 2005 йилдаёқ эътиборни торта бошлаган. The Jerusalem Post газетасининг ёзишича, айнан шу йили Халқаро суд Исроилнинг Ғарбий Соҳилдаги хавфсизлик тўсиғини халқаро ҳуқуққа зид деб топган эди. Бу ҳаракат Исроилнинг Ғазодаги уруши бошланганидан кейин янада кенг қўллаб-қувватланди.

Financial Times’нинг маълум қилишича, оммавий бойкот ҳаракатлари айни пайтга келиб “бир қатор йирик трансмиллий компанияларнинг даромадларига таъсир кўрсатмоқда”. Бойкот ҳаракатига дуч келган кўплаб трансмиллий корпорациялар “географик ва тоифавий тарқалиши туфайли ушбу зарбани енгиб ўтган” бўлса-да, "бойкотлар кенг тарқалган" мамлакатлардаги уларнинг франчайзинглари молиявий инқирозга учрамоқда.

Яқин Шарқ ва Қозоғистон бўйлаб KFC, Pizza Hut ва Crispy Creme каби брендларни бошқарадиган Americana Restaurants компаниясининг бош директори Амарпал Сандҳу пайшанба куни бўлиб ўтган даромадлар тўғрисидаги ҳисоботида бойкотларнинг давомийлиги ва шиддатини "мисли кўрилмаган" деб таърифлади.

Компаниянинг иккинчи чоракда олган фойдаси ўтган йилнинг шу даврига нисбатан 40 фоизга камайган. Американинг газаклар ишлаб чиқарувчи Mondelēz International компанияси ҳам бойкотлар туфайли иккинчи чоракда маҳсулотлар етказиб беришни 2 фоизга пасайтирганини билдирди. Машҳур парфюмерия ва косметика воситалари ишлаб чиқарувчи француз компанияси L’Oréal ҳам савдо ҳажмини 2 фоизга қисқартиришга мажбур бўлган. 

Бу эса биргина мусулмонларнинг огоҳлиги ва жамоавий ҳаракати ортидан Ислом душманлари қанчалик молиявий зарар кўришини англатади. Шу боис ҳам бегуноҳ фаластинликлар устига ташланаётган бомбаларни камайтириш учун сионистлар зулмини дастакловчи барча комапаниялар маҳсулотларидан воз кечиш ёки уни муқобилига алмаштириш ҳар бир мусулмоннинг бурчидир.