Rossiya Ichki ishlar vazirligi mamlakatda 630 mingga yaqin noqonuniy muhojir istiqomat qilishini maʻʻlum qildi. Ularning mamlakatni ixtiyoriy ravishda tark etishlari uchun 2025 yilda nazorat qilinadigan shaxslarning maxsus reestri joriy etiladi. Qayd etilishicha, 2023 yilda RFda qonuniy ravishda boʻlgan mehnat muhojirlari soni 3,5 million kishidan oshmagan. Ularning aksariyati Oʻzbekiston, Tojikiston va Qirgʻiziston fuqarolaridir.

Rossiya Savdo-sanoat palatasi vitse-prezidenti Elena Dibova NTV telekanaliga bergan intervʻyusida mamlakatdagi harbiy zavodlarda ishlaydigan odam yoʻqligini taʻʻkidlab, xizmat koʻrsatish, jumladan, kurʻerlik va taksichilikni taqiqlab, ushbu sohalarda ishlaydiganlarni harbiy zavodlarga joʻnatishni taklif qildi.

LDPR deputatlari mehnat muhojirlariga oilalarini Rossiyaga koʻchirib kelishini taqiqlashni koʻzda tutgan qonun loyihasini ishlab chiqmoqda. Davlat Dumasi vakilining fikricha, bu ishchi kuchi etishmasligi bilan bogʻliq vaziyatning yanada yomonlashuviga olib keladi.

Mehnat muhojirlarining Rossiyani ommaviy tark etishi fonida ish beruvchilar migrantlarning oylik maoshlarini oshirishga majbur boʻlmoqda. Bu esa, oʻz navbatida, tovar va xizmatlar tannarxining oshishi hamda sifatining tushishiga sabab boʻlmoqda - “Moskovskiy komsomolets” tadqiqoti.

Soʻnggi paytlarda Rossiya kompaniyalari MDHdan tashqari mamlakatlardan ishchilarni qidirish boʻyicha faolligini sezilarli darajada oshirdi. Deyarli barchani hayratda qoldirgan narsa – mehnat zaxiralarining hatto Afrikadan ham jalb qilingani! Bundan tashqari, ushbu jarayon bir necha yil oldin boshlangan va faqat jadal rivojlanmoqda.

Rossiya prezidenti Vladimir Putin yaqin yillarda mamlakatda xodimlar va malaka etishmasligi muammosi kuzatilishini maʻʻlum qildi. U mehnat bozorida yaqinlashib kelayotgan xodimlar tanqisligini past malakali muhojirlar hisobidan qoplashni taqiqladi. "Bizga boshqa yondashuvlar kerak", - dedi Rossiya prezidenti.

Oʻtkazilgan ijtimoiy soʻrov natijalariga koʻra, “Krokus Siti Xoll”dagi fojiadan soʻng rossiyaliklarning 55-60 foizi mehnat muhojirlariga nisbatan “aniq salbiy” fikrga kelgan. Sakkiz oy muqaddat bu koʻrsatkich 40 foizni tashkil etgandi.

Moskvadagi qurilish maydonida qurilish materiallarining notoʻgʻri taqsimoti sababli Oʻzbekiston va Tojikiston fuqarolari ommaviy mushtlashdi. Natijada 10 nafar oʻzbekistonlik va 13 nafar tojikistonlik mehnat muhojirlari qoʻlga olindi. Hodisada hech kim jabrlanmagan.

Qrimda bir qator sohalarda chet el fuqarolarini ishga olishni taqiqlashga qaror qildi. Ular orasida transport, ishlab chiqarish, IT, sport va dam olish sohalari mavjud. Avvalroq Novosibirsk, Samara va Yoqutistonda ham bir qator sohalar mehnat muhojirlari uchun “yopilgan” edi.

Chet eldagi fuqarolar uchun elchixonalarda 24 soatlik “koll-markazlar”, ishchi viza, yoʻl chiptasi, xorijiy til va kasb boʻyicha malakani baholatish xarajatlari qisman qoplash, xorijiy migratsiyadan qaytgan fuqarolar uchun moliyaviy yordam va boshqa takliflar – Oʻzbekiston prezidentiga mehnat migrantlarini qoʻllab-quvvatlashga qaratilgan takliflar taqdimot qilindi.