Rossiyada kurʻer va taksi haydovchilarini harbiy zavodlarga yuborish taklif qilindi

Rossiya Savdo-sanoat palatasi vitse-prezidenti Elena Dibova NTV telekanaliga bergan intervʻyusida mamlakatdagi harbiy zavodlarda ishlaydigan odam yoʻqligini taʻʻkidlab, xizmat koʻrsatish, jumladan, kurʻerlik va taksichilikni taqiqlab, ushbu sohalarda ishlaydiganlarni harbiy zavodlarga joʻnatishni taklif qildi.

Rossiya Savdo-sanoat palatasi vitse-prezidenti Elena Dibova Rossiyada kurʻer va taksi haydovchilarini taqiqlashni hamda ushbu sohalarda ishlaydiganlarni harbiy zavodlarga yuborishni taklif qildi. Amaldor ayol oʻz tashabbusini "mamlakatda davlat mudofaa buyurtmasini bajaradigan hech kim yoʻq"ligi bilan izohladi. Ushbu sohalarda asosan mehnat muhojirlari ishlaydi.

"Yoʻq, hurmatli oʻrtoqlar, vaziyat shunday: doʻkonga piyoda borishingizga toʻgʻri keladi. <…> Faoliyatning ayrim turlari taqiqlanishi lozim. Yoki fabrikalarimizda ishlaydigan hech kim boʻlmaydi va biz shunchaki xizmat koʻrsatish bilan shugʻullanamiz. Yoki bularni amalga oshiramiz: birinchidan, bu oʻtkir mobilizatsiya stsenariysi, ikkinchidan, xohlaymizmi yoki yoʻqmi, mehnat unumdorligi bilan shugʻullanishimiz kerak”, — dedi Dibova NTV telekanalida.

Rossiya amaldorlari birinchi marta asosan mehnat muhojirlari ishlaydigan kurʻerlik va taksichilik kabi sohalarda band boʻlganlarni harbiy zavodlarga yuborishni taklif qilayotgani yoʻq. Oʻtgan yilning bahorida Tatariston sanoat va savdo vaziri Oleg Korobchenko ham xuddi shunday tashabbus bilan chiqqan edi. “Kurʻerlar, taksi haydovchilari va pitstsa etkazib beruvchilarning ulkan armiyasi oddiy kasb-hunar egallashi va fabrikalarimizda ishlashi uchun hamma narsani qilishimiz kerak”, degan edi u. Amaldorning taʻʻkidlashicha, respublikadagi korxonalar 4 ming ishchiga muhtoj va "bu ehtiyoj oʻsishda davom etmoqda".

Iyulʻ oyida Vladimir Putin ham sanoatdagi kadrlar etishmovchiligi muammosini hal qilish uchun hukumatdan 2028 yilga qadar 1 millionga yaqin “koʻk xalatlilar”ni tayyorlashni talab qilgan edi. Bundan tashqari, prezident kollej va texnikumlarning moddiy-texnik bazasini modernizatsiya qilish, kasb-hunar taʻʻlimi tizimini mehnat bozori ehtiyojlariga moslashtirish zarurligini taʻʻkidladi.

Oʻtgan yil oxirida Rossiya Fanlar akademiyasining Iqtisodiyot instituti 2023 yil oxirida Rossiyada kadrlar etishmovchiligi 4,8 million ishchini tashkil etganini maʻʻlum qilgandi.