Қозоғистоннинг турли вилоятларида рўй берган сув тошқинлари сабабли 12,7 мингдан зиёд киши, жумладан, 5101 нафар бола хавфли жойлардан кўчирилди. Тошқинлар сабабли Россия-Қозоғистон чегарасидаги маҳаллий ва халқаро аҳамиятга эга йўллар тўсилиб қолди.

Урал дарёси сатҳи бутун давр учун рекорд даражада кўтарилиши натижасида Россиянинг Оренбург вилоятида аҳоли пунктларини сув босишда давом этмоқда. Тўғонлар сув босимига бардош бера олмаяпти. Одамлар оммавий эвакуация қилинмоқда. Қозоғистоннинг шимолий ҳудудудларида ҳам охирги 80 йилликдаги энг йирик сув тошқинлари кузатилмоқда.

Қозоғистондаги кенг кўламли сув тошқинлари билан боғлиқ вазият туфайли 13-14 июнь кунлари ўтказиш режалаштирилган Остона халқаро форуми бекор қилинди. Тадбир 2025 йилда ўз ишини давом эттиради. Мамлакатнинг 6 та вилоятида 6 мингга яқин уй-жойлар ва далалар сув остида қолмоқда.

Қозоғистон президенти Қасим-Жомарт Тоқаев тошқиндан жабр кўрган ҳудудларга ёрдам беришга маҳаллий миллиардерларни жалб қилиш ғоясини таклиф қилди. У ҳар бир вилоят, туман ва қишлоққа мамлакатдаги энг бой кишилардан бирини бириктириш зарурлигини таъкидлади.

Ҳар йили дунёнинг турли қисмларида сув тошқинлари рўй бериб туради. Бу мавзудаги хабарларни оддий қабул қилиб ўрганиб қолганмиз, ҳатто эътибор ҳам бермаймиз. Аксарият тошқинлар дунёнинг олис қисмларида рўй бергани учун бизга мутлақо алоқаси йўқ, деб ҳисоблаймиз ҳам. Аммо дўппини ерга қўйиб, бу ҳақда жиддий ўйлаш, бизни кутаётган эҳтимолий офатларга тайёргарлик кўриш вақти келди. Чунки барчамиз битта кемадамиз – БАА, Уммон, Танзания ёки Хитойда рўй берган сув тошқинлари бизнинг ҳам эшигимизни қоқиб турибди. Яқинда Россия ва Қозоғистонда кузатилган тошқинларнинг эпкинини эса танамиз билан ҳис қилдик ҳам.

Саудия Арабистони бўйлаб сув тошқинлари давом этмоқда, Ар-Риёд, Даммам ва Макка ва Мадина атрофидаги ҳудудларда йўлларни сув босмоқда. Қирол Фаҳд университети ҳудудида жойлашган Эски Даҳран масжиди ташқи иншооти томи бир кечада қулаб тушди.

Тинимсиз ёғингарчилик туфайли Афғонистоннинг Бағлон вилоятида сув тошқинлари юзага келди. Сел уйларни вайрон қилган, 200 га яқин одам ҳалок бўлган ва бедарак йўқолган.

Дунё бўйлаб давом этаётган сув тошқинлари қурбонлари сони ҳам ортиб бормоқда. Сўнгги кунларда сув тошқинлари сабабли Афғонистонда 300 дан зиёд киши офат қурбонига айланган бўлса, бу кўрсаткич Кенияда 267, Бразилияда 144, Индонезияда 27 нафарни ташкил этмоқда. Жабрланганлар сони ва зарарлар миқдори ҳам жуда юқори.

Эроннинг Машҳад шаҳрида кучли ёмғир келтириб чиқарган сув тошқини оқибатида етти киши ҳалок бўлди. Машҳад муниципалитети раҳбари Моҳсен Даверининг айтишича, тошқиндан жабрланган камида 250 оила шаҳарнинг хавфсизроқ жойларига эвакуация қилинган. Шаҳардаги жами 150 та уй сув тошқинидан зарар кўрган. 12 киши бедарак йўқолган.

Афғонистоннинг шарқидаги Нангарҳор вилоятида кучли ёғингарчиликлар келтириб чиқарган сув тошқини оқибатида камида 40 киши ҳалок бўлди, яна 347 киши жароҳатланди. Шунингдек, ҳудудда 400 га яқин уй вайрон бўлган. Кўпгина ҳудудларда электр энергияси узилган