Украина август ойида босиб олинган Россия ҳудудларининг 40 фоиздан ортиғини бой берди. Россия Киев юришини тўхтатиш учун Курск вилоятига 59 мингга яқин аскарини жойлаштирган. Бундан ташқари, Шимолий Кореянинг 11 мингга яқин аскари ҳам Россияни қўллаб-қувватлаш учун Курск вилоятига келган.

Россия президенти Владимир Путин Курск вилоятига бостириб кирган Украина Қуролли кучларининг айрим бўлинмалари қуршовга олингани ва йўқ қилинаётганини билдирди. Бундан ташқари, у Россия армияси Украинадаги бутун фронт чизиғи бўйлаб олдинга силжишда давом этаётганини таъкидлади. Украина томони ҳозирча унинг баёнотларига муносабат билдиргани йўқ.

Россия қўшинлари 10 га яқин аҳоли пунктини қайтариб олди, дея маълум қилди генерал-майор Апти Алаудинов. Турли манбалар ҳам Россиянинг қарши ҳужумга ўтганини тасдиқлади. Маълумотларга кўра, рус қўшинлари тахминан 150 кв км майдонда олдинга силжиган.

Украина Қуролли кучлари бош қўмондони Александр Сирский айни пайтда Россиянинг Курск вилоятида 1294 кв км майдон ҳамда 100 та аҳоли манзили назорат остига олинганини маълум қилди. Шунингдек, 594 нафар рус аскари асирга тушган.

Россия украин қўпорувчилик-разведка гуруҳи Брянск вилоятининг Климовский тумани ҳудудига бостириб кирмоқчи бўлганини маълум қилди. Иддаога кўра, ушбу уриниш Россия ФСБ ва Қуролли Кучлари томонидан бартараф этилган.

Охирги маълумотларга кўра, Украина қуролли кучлари ҳужумлари оқибатида Россиянинг Курск вилоятида 17 нафар тинч аҳоли вакили ҳалок бўлган, 140 дан ортиғи жароҳатланган. Яраланганларнинг 75 нафари касалхонага ётқизилган.

Россия ҳарбий қўмондонлиги украин армияси босқинини қайтариш учун Украинадаги фронт чизиғидан 5 минг аскардан иборат гуруҳни Курск вилоятига кўчирди. Улар асосан Донецк вилояти ва стратегик аҳамияти камроқ бўлган ҳудудлардан Россияга қайтарилган. Мутахассислар Россияга Украина ҳужумларини бартараф этиш учун камида 20 минг нафар яхши тайёргарликдан ўтган ҳарбийлар кераклигини таъкидламоқда.

Россиянинг Курск вилоятига бостириб кирган украин қўшинлари 14 куни бир мартада 102 нафар рус ҳарбийларини асирга туширди. Украина Хавфсизлик хизматининг “разведка бошқармаси ходимлари томонидан амалга оширилган махсус операция чоғида Россия Қуролли Кучларининг 488-гвардия мотоўқчилар полки ва чеченистонликлардан иборат “Ахмат” бўлинмаси аскарлари таслим бўлган.

Украина президенти Владимир Зеленский украин қўшинлари Россиянинг Курск вилояти ҳудудидаги операцияси давом этаётгани, 6 августдан буён РФ ҳудудидаги 74 та аҳоли манзилини ўз назоратига олганини маълум қилди. Украин армияси маълумотларига кўра, сўнгги 24 соат ичида Украина қуролли кучлари турли йўналишларда 1 километрдан 3 километргача олдинга силжиган.

Украина армияси бош қўмондони Александр Сирский илк бор украин қуролли кучларининг Курск вилоятидаги амалиётига изоҳ берди. “Айни пайтда Россия Федерациясининг 1000 кв. км. га яқин майдони назоратимиз остида”, - деди у.