Бутун дунёнинг нигоҳи Ғазо ва Украинага қараб турган бир вақтда, бир йилдан буён фуқаролик урушидан азият чекаётган 50 миллион аҳолига эга Суданда 15 минг тинч аҳоли қурбон бўлди, 25 миллион киши очликдан азият чекмоқда ва 11 миллион киши ўз уйларини тарк этди. Бироқ хорижий ҳомийлар Хартумга Киевга қараганда 1000 баравар камроқ ёрдам ажратмоқда.
Иордания қироли Абдуллоҳ Иккинчи Исроилга Эрон ракеталарини йўқ қилишда ёрдам берганига изоҳ берди. Иордания раҳбарининг сўзларига кўра, у ўз мамлакати уруш театрига айланишини истамайди ва ўз хавфсизлигини таъминлаш мақсадида Эрон ракеталарини йўқ қилган.
Россия ҳарбийлари Украинанинг Чернигов шаҳрига зарба берди, натижада 11 киши ҳалок бўлди, яна 22 киши яраланди. Вайроналар остида ҳали ҳам одамлар бўлиши мумкин.
Исроил Ғазо секторида босқинчилик ва қирғинбарот урушини бошлаганига 194 кун бўлди. 24 соат давомида Ғазо сектори, Иордан дарёсининг Ғарбий соҳили ҳамда бутун Яқин Шарқ ҳудудида содир бўлган асосий воқеалар.
Афғонистон, Покистон ва БААда кучли ёғингарчиликлар кузатилмоқда. Покистонда чақмоқ ва жала туфайли 36 киши, Афғонистонда эса 50 дан ортиқ киши ҳалок бўлди. Дубайда эса 1,5 кун ичида йиллик меъёрдан 2 баравар кўп ёмғир ёғди. Ўнлаб парвозлар бекор қилинди, юзлаб рейслар кечиктирилди.
Москва вилояти Троицк шаҳридаги Абу Бакр масжиди аҳоли норозилиги сабабли бузиб ташланди. Шу тариқа Троитск мусулмон жамоаси ҳамда масжид бузилишини талаб қилган маҳаллий аҳоли ва миллатчи фаоллар ўртасидаги уч йиллик қарама-қаршилик якунига етди.
АҚШнинг The New York Times газетаси Исроилнинг Ғазода олиб бораётган урушини ёритаётган журналистларига “геноцид” ва “этник тозалаш” атамаларини ишлатишни чеклаш ҳамда Фаластинга нисбатан “босиб олинган ҳудуд” иборасини ишлатмасликни топширди. Шунингдек, “Фаластин” сўзини камроқ ишлатиш ва “қочқинлар чодиргоҳи” атамаларидан қочиш ҳам буюрилди.
АҚШ Украина, Исроил ва Тайванга ёрдам кўрсатишни ўз ичига олган ҳамда ҳар бири алоҳида овоз бериш орқали кўриб чиқиладиган режа лойиҳасини тақдим этди. Ушбу режанинг Украина қисмида ёрдам грантлар кўринишида эмас, балки кредит шаклида тақдим этилиши кўзда тутилган.
Британияда ўтказилган сўровномада мусулмонлар сўнгги 12 ой давомида ўртача 708 фунт стерлинг (880 доллар) хайрия қилгани маълум бўлди. Бошқа динга мансуб британияликлар эса – 165 фунт стерлинг (205 доллар). Ҳар тўрт британиялик мусулмоннинг уч нафари ўз хайриясини Ғазодаги фаластинликларга ажратган.
Ироқдаги Абу Ғрайб қамоқхонасининг омон қолган собиқ маҳбуслари 20 йил муқаддам ўзларини шафқатсиз ва ғайриинсоний тарзда қийноққа солган, жинсий зўрлаган америкалик ҳарбийларни судга бериш имконига эга бўлди.