Ispaniyada 1973 yildan beri halokatli tabiiy ofat sodir boʻldi – kuchli yogʻingarchiliklar sababli yuzaga kelgan suv toshqini oqibatida kamida 95 kishi halok boʻldi. Valensiya avtonom hamjamiyati eng koʻp jabr koʻrdi, u erda 92 kishi hayotdan koʻz yumdi. Hukumat qurbonlar soni ortishi mumkinligidan ogohlantirdi.

Bangladeshda musson yomgʻirlari tufayli roʻy bergan suv toshqini, koʻchki va daryo toshishi oqibatida halok boʻlganlar soni 27 kishiga etdi, 2 kishi bedarak yoʻqoldi. Yogʻingarchiliklar oqibatlaridan butun mamlakat boʻylab 5,6 millionga yaqin odam jabrlandi, 35 ming bosh chorva mollari xavfsiz hududlarga koʻchirildi.

Hindistonning toʻgʻonni ochib yuborishi Bangladeshda katta hududlarni suv bosishiga sabab boʻlib, gumanitar inqirozni yuzaga keltirdi. Bunga qoʻshni mamlakatda yaqinda hindularga hujum qilinganiga javob sifatida yoʻl qoʻyilgani sabab ekani aytilmoqda. Umuman, kuchli yogʻingarchiliklar va suv toshqinlaridan Bangladeshda 4,5 million kishi jabrlandi, oxirgi uch kun ichida 13 kishi halok boʻldi.

Iyulʻ oyi oxirlaridan buyon Yamanda kuzatilayogan kuchli yomgʻir va suv toshqinlari sababli hayotdan koʻz yumganlar soni 61 nafarga etdi. Ularning katta qismi ichki urushlar natijasida koʻchirilgan fuqarolardir. Yaman hukumati xalqaro hamjamiyatdan suv toshqinlari qurbonlariga insonparvarlik yordami ajratilishini soʻradi.

Afgʻonistonning sharqidagi Nangarhor viloyatida kuchli yogʻingarchiliklar keltirib chiqargan suv toshqini oqibatida kamida 40 kishi halok boʻldi, yana 347 kishi jarohatlandi.

Eronning Mashhad shahrida kuchli yomgʻir keltirib chiqargan suv toshqini oqibatida etti kishi halok boʻldi. Mashhad munitsipaliteti rahbari Mohsen Daverining aytishicha, toshqindan jabrlangan kamida 250 oila shaharning xavfsizroq joylariga evakuatsiya qilingan. Shahardagi jami 150 ta uy suv toshqinidan zarar koʻrgan. 12 kishi bedarak yoʻqolgan.

Dunyo boʻylab davom etayotgan suv toshqinlari qurbonlari soni ham ortib bormoqda. Soʻnggi kunlarda suv toshqinlari sababli Afgʻonistonda 300 dan ziyod kishi ofat qurboniga aylangan boʻlsa, bu koʻrsatkich Keniyada 267, Braziliyada 144, Indoneziyada 27 nafarni tashkil etmoqda. Jabrlanganlar soni va zararlar miqdori ham juda yuqori.

Tinimsiz yogʻingarchilik tufayli Afgʻonistonning Bagʻlon viloyatida suv toshqinlari yuzaga keldi. Sel uylarni vayron qilgan, 200 ga yaqin odam halok boʻlgan va bedarak yoʻqolgan.

Saudiya Arabistoni boʻylab suv toshqinlari davom etmoqda, Ar-Riyod, Dammam va Makka va Madina atrofidagi hududlarda yoʻllarni suv bosmoqda. Qirol Fahd universiteti hududida joylashgan Eski Dahran masjidi tashqi inshooti tomi bir kechada qulab tushdi.

Har yili dunyoning turli qismlarida suv toshqinlari roʻy berib turadi. Bu mavzudagi xabarlarni oddiy qabul qilib oʻrganib qolganmiz, hatto eʻʻtibor ham bermaymiz. Aksariyat toshqinlar dunyoning olis qismlarida roʻy bergani uchun bizga mutlaqo aloqasi yoʻq, deb hisoblaymiz ham. Ammo doʻppini erga qoʻyib, bu haqda jiddiy oʻylash, bizni kutayotgan ehtimoliy ofatlarga tayyorgarlik koʻrish vaqti keldi. Chunki barchamiz bitta kemadamiz – BAA, Ummon, Tanzaniya yoki Xitoyda roʻy bergan suv toshqinlari bizning ham eshigimizni qoqib turibdi. Yaqinda Rossiya va Qozogʻistonda kuzatilgan toshqinlarning epkinini esa tanamiz bilan his qildik ham.