Ukraina avgust oyida bosib olingan Rossiya hududlarining 40 foizdan ortigʻini boy berdi. Rossiya Kiev yurishini toʻxtatish uchun Kursk viloyatiga 59 mingga yaqin askarini joylashtirgan. Bundan tashqari, Shimoliy Koreyaning 11 mingga yaqin askari ham Rossiyani qoʻllab-quvvatlash uchun Kursk viloyatiga kelgan.

Rossiya prezidenti Vladimir Putin Kursk viloyatiga bostirib kirgan Ukraina Qurolli kuchlarining ayrim boʻlinmalari qurshovga olingani va yoʻq qilinayotganini bildirdi. Bundan tashqari, u Rossiya armiyasi Ukrainadagi butun front chizigʻi boʻylab oldinga siljishda davom etayotganini taʻʻkidladi. Ukraina tomoni hozircha uning bayonotlariga munosabat bildirgani yoʻq.

Rossiya qoʻshinlari 10 ga yaqin aholi punktini qaytarib oldi, deya maʻʻlum qildi general-mayor Apti Alaudinov. Turli manbalar ham Rossiyaning qarshi hujumga oʻtganini tasdiqladi. Maʻʻlumotlarga koʻra, rus qoʻshinlari taxminan 150 kv km maydonda oldinga siljigan.

Ukraina Qurolli kuchlari bosh qoʻmondoni Aleksandr Sirskiy ayni paytda Rossiyaning Kursk viloyatida 1294 kv km maydon hamda 100 ta aholi manzili nazorat ostiga olinganini maʻʻlum qildi. Shuningdek, 594 nafar rus askari asirga tushgan.

Rossiya ukrain qoʻporuvchilik-razvedka guruhi Bryansk viloyatining Klimovskiy tumani hududiga bostirib kirmoqchi boʻlganini maʻʻlum qildi. Ushbu urinish Rossiya FSB va Qurolli Kuchlari tomonidan bartaraf etilgan.

Oxirgi maʻʻlumotlarga koʻra, Ukraina qurolli kuchlari hujumlari oqibatida Rossiyaning Kursk viloyatida 17 nafar tinch aholi vakili halok boʻlgan, 140 dan ortigʻi jarohatlangan. Yaralanganlarning 75 nafari kasalxonaga yotqizilgan.

Rossiya harbiy qoʻmondonligi ukrain armiyasi bosqinini qaytarish uchun Ukrainadagi front chizigʻidan 5 ming askardan iborat guruhni Kursk viloyatiga koʻchirdi. Ular asosan Donetsk viloyati va strategik ahamiyati kamroq boʻlgan hududlardan Rossiyaga qaytarilgan. Mutaxassislar Rossiyaga Ukraina hujumlarini bartaraf etish uchun kamida 20 ming nafar yaxshi tayyorgarlikdan oʻtgan harbiylar kerakligini taʻʻkidlamoqda.

Rossiyaning Kursk viloyatiga bostirib kirgan ukrain qoʻshinlari 14 kuni bir martada 102 nafar rus harbiylarini asirga tushirdi. Ukraina Xavfsizlik xizmatining “razvedka boshqarmasi xodimlari tomonidan amalga oshirilgan maxsus operatsiya chogʻida Rossiya Qurolli Kuchlarining 488-gvardiya motooʻqchilar polki va chechenistonliklardan iborat “Axmat” boʻlinmasi askarlari taslim boʻlgan.

Ukraina prezidenti Vladimir Zelenskiy ukrain qoʻshinlari Rossiyaning Kursk viloyati hududidagi operatsiyasi davom etayotgani, 6 avgustdan buyon RF hududidagi 74 ta aholi manzilini oʻz nazoratiga olganini maʻʻlum qildi. Ukrain armiyasi maʻʻlumotlariga koʻra, soʻnggi 24 soat ichida Ukraina qurolli kuchlari turli yoʻnalishlarda 1 kilometrdan 3 kilometrgacha oldinga siljigan.

Ukraina armiyasi bosh qoʻmondoni Aleksandr Sirskiy ilk bor ukrain qurolli kuchlarining Kursk viloyatidagi amaliyotiga izoh berdi. “Ayni paytda Rossiya Federatsiyasining 1000 kv. km. ga yaqin maydoni nazoratimiz ostida”, - dedi u.