АҚШда президент Жо Байденнинг кейинги савловларда қатнашишга муносиб номзод эмаслиги ҳақидаги гап-сўзлар кўпаймоқда. Жумладан, Жанубий Каролинадан сенатор Линдси Грем 81 ёшли давлат раҳбарининг ақлий ва жисмоний ҳолатини текширишга чақирди. Вакиллар палатасининг 25 кишилик демократлар гуруҳи ҳам Байденни президентлик сайлови пойгасидан чиқишга чақирди. АҚШ вице-президенти Камала Харрис демократлардан ишончлироқ номзод бўлиши мумкинлиги айтилмоқда.

Федерал қидирув бюроси раҳбари Кристофер Рей америкаликларни АҚШ ҳудудида Москва яқинидаги "Крокус Сити холл"га уюштирилган ҳужумга ўхшаш теракт содир этилиши эҳтимоли ҳақида огоҳлантирди.

АҚШнинг собиқ президенти Дональд Трампга суиқасд уюштирилганидан сўнг ўта ўнгчи онлайн ҳамжамиятларда зўравонлик ва фуқаролар урушига чақирувлар кескин кўпайгани айтилмоқда. Айрим Трамп тарафдорлари ҳатто "барча демократлар ва демократ бўлишни ўйлайдиганларни ҳам йўқ қилиб ташлаш"га чақирмоқда.

Америкалик миллиардер Илон Маск ўз жинсини ўзгартирмоқчи бўлган мактаб ўқувчиларини ҳимоя қилиш ҳақидаги қонун туфайли X ва SpaceX компаниялари штаб-квартирасини Калифорниядан Техасга кўчирмоқчи. Гап шундаки, энди Калифорнияда мактаб ўқувчисининг трансгендерликни танлагани ҳатто унинг ота-онасидан ҳам сир сақланади. Тадбиркор янги тартиб туфайли болаларнинг ҳаёти хавф остида қолаётганини таъкидламоқда.

11 сентябрь терактларининг асосий ташкилотчиси сифатида айбланган Холид Шайх Муҳаммад ўз айбини тан олишга рози бўлди. Муҳаммад ва унинг икки шериги Валид бин Атташ ва Мустафо Ал-Ҳавсавий келаси ҳафтанинг бошида ўз айбларини Кубадаги Гуантанамо қамоқхонасида ҳарбий комиссияга тақдим этиши кутилмоқда.

Токио фонд биржаси индекси Қўшма Штатларда ишсизлик даражаси ўсгани ҳақидаги маълумотлар фонида рекорд даражадаги 9 фоизга тушди, айрим ҳолларда пасайиш 13 фоизни ташкил этди. Бу 1987 йилдаги “қора душанба”дан бери энг катта пасайишдир.

АҚШ Давлат департаменти Исроилга 19 млрд долларлик F-15 самолётлари ва жиҳозларини, шунингдек, тахминан 774 млн долларлик танк ўқ-дорилари ва 583 млн долларлик ҳарбий машиналарни сотишни маъқуллади. Boeing компанияси F-15 қирувчиларини бир неча йил давомида ишлаб чиқариб, етказиб беради. Танк ўқ-дорилари эса зудлик билан топширилади.

Пентагон Россиянинг НАТО давлатига ҳужум қилиб, Американи Европа ҳимоясига тортиши, сўнгра Хитой Вашингтоннинг чалғишидан фойдаланган ҳолда Тайванга бостириб кириши ҳамда шу вақтда Шимолий Корея Жанубий Кореяга ҳужум қилиши билан боғлиқ эҳтимолий воқеалар ривожини моделлаштирмоқда. Шу муносабат билан АҚШ президенти Жо Байден маъмурияти "ўн йиллик чуқур қисқартиришлардан" сўнг шай ҳолатга келтирилган ядровий кучларни кўпайтиришга тайёргарлик кўра бошлади.

Ғазода уруш бошланган 2023 йил 7 октябридан буён АҚШ Исроилга ҳаво ва денгиз орқали 50 минг тоннадан ортиқ қурол-яроғ етказиб берди. Исроил Мудофаа вазирлиги маълумотларига кўра, 500 та парвоз ва 107 та денгиз жўнатмалари орқали 50 минг тоннадан ортиқ ҳарбий техника ва техника етказиб берилган.

Айни пайтда дунё яна қайта шаклланиш остонасида турибди. Бунинг белгиларини дунёни ларзага солаётган воқеа-ҳодисаларда кўриш мумкин. Россия-Украина урушидан аввалроқ заифлашиб бораётган империя – АҚШ ва янги пайдо бўлган куч – Хитой ўртасидаги уруш қайсидир маънода бошланиб бўлди.