"Сорос" халқаро жамғармасининг бутун Марказий Осиё бўйича фаолиятини мувофиқлаштирувчи "Сорос-Қирғизистон" жамғармаси хорижий агентлар тўғрисидаги қонун қабул қилиниши муносабати билан республикадаги фаолиятини тўхтатмоқда.
Москвадаги қурилиш майдонида қурилиш материалларининг нотўғри тақсимоти сабабли Ўзбекистон ва Тожикистон фуқаролари оммавий муштлашди. Натижада 10 нафар ўзбекистонлик ва 13 нафар тожикистонлик меҳнат муҳожирлари қўлга олинди. Ҳодисада ҳеч ким жабрланмаган.
Тожикистон Туркиянинг виза тартибини жорий этиш тўғрисидаги қарорига жавоб қайтарди. Унга кўра, Туркия фуқаролари 20 апрелдан Тожикистонга келиш учун виза олишлари талаб этилади.
Қозоғистон президенти оиладаги зўравонлик учун жиноий жавобгарлик жорий этувчи қонунни имзолади. Унга кўра, эндиликда саломатликка енгил шикаст етказганлар жиноий жавобгарликка тортилади. Болаларга нисбатан ҳам қандай зўравонлик шакли учун жавобгарлик кучайтирилди.
Қирғизистон Россия ИИВ расмий вакилининг рус милицияси Москвада қирғиз дипломати уйига бостириб кирганини рад этган баёнотига норозилик билдирди. Қирғиз томони полициячилар кўкрак камералари ёзувлари ҳамда Россия ТИВга тақдим этилган фотосуратларни тезкорлик ва холислик билан ўрганган ҳолда хизмат текшируви ўтказилишини сўради.
Uzbekistan Airways миллий авиакомпанияси Нукусдан Истанбулга тўғридан-тўғри самолётлар қатновини йўлга қўяди. Парвозлар ҳафтада бир марта – душанба кунлари амалга оширилиши айтилмоқда.
Қозоғистондаги кенг кўламли сув тошқинлари билан боғлиқ вазият туфайли 13-14 июнь кунлари ўтказиш режалаштирилган Остона халқаро форуми бекор қилинди. Тадбир 2025 йилда ўз ишини давом эттиради. Мамлакатнинг 6 та вилоятида 6 мингга яқин уй-жойлар ва далалар сув остида қолмоқда.
Россия ИИВнинг икки ходими Москвада Қирғизистон элчихонаси маслаҳатчисининг уйига эшикни бузиб кирди. Улар дипломатик паспорт ва карталар тақдим этилганига қарамасдан, миграция рўйхатидан ўтганлик ҳақидаги ҳужжатларни тақдим этишни тажовузкорона тарзда талаб қилган. Қирғизистон ТИВ норозилик билдирди.
Туркиянинг Исроилга 54 турдаги маҳсулотлар экспортини тақиқлагани ортидан Тел-Авив АҚШдан турк иқтисодиётига сармоялар киритишни тўхтатишни сўради. Шунингдек, “Туркия иқтисодиётига зарар келтирадиган параллел чоралар кўриш”га ваъда берди.
Туркия 9 апрелдан Исроилга Ғазода зудлик билан ўт очишни тўхтатмагунча ва Фаластин анклавига ёрдам кўрсатишга рухсат берилмагунча 54 турдаги маҳсулот экспортини тақиқлади.