Ўзбекистон, Қирғизистон ва Тожикистон муҳим келишувга эришмоқда

Ўзбекистон, Қирғизистон ва Тожикистон раҳбарлари уч давлатнинг давлат чегаралари туташган нуқтаси бўйича тарихий шартномани имзолашга келишиб олди. Бу ҳақда Тожикистон Президенти Эмомали Раҳмон Бишкекдаги расмий ташриф чоғида маълум қилди.

Маълумотларга кўра, мазкур шартнома жорий йилнинг 31 март куни Хўжанд шаҳрида уч мамлакат президентлари томонидан имзоланади. Бу қўшни давлатлар ўртасидаги чегара масалалари бўйича эришилган йирик дипломатик ютуқлардан бири ҳисобланади.

Шунингдек, бундай ҳужжатлар чегара ҳудудларидаги кўп йиллик келишмовчиликлар, баҳслар ва ноаниқликларга барҳам бериш, ҳудудий яхлитликни мустаҳкамлаш ва халқлар ўртасидаги дўстона муносабатларни янада ривожлантириш учун муҳим аҳамиятга эга.

Эслатиб ўтамиз, бунга ўхшаш чегара аниқлаш бўйича шартнома 2017 йили Ўзбекистон, Қозоғистон ва Туркманистон ўртасида имзоланган эди. Бу ҳам чегара масалаларини тинч йўл билан ҳал этиш ва минтақа хавфсизлигини мустаҳкамлаш йўлидаги катта қадам сифатида баҳоланган.