Яшаш гувоҳномаси муддатлари узайтирилмаётгани, янги келганларга рухсат берилмаётгани, уй ва ижара нархлари кескин ортиб кетгани сабабли ўн минглаб чет элликлар Туркияни тарк этмоқда. Биргина Антальяни 2023 йилда 40 минг хорижлик тарк этди.
Туркияда хусусий детективлар орқали Исроил разведка хизмати – МОССАДга маълумот сотган етти нафар гумондор қўлга олинди. Улар биографик маълумотлар, фото-видео ҳужжатлар тўплаш, жонли кузатиш ва нишонларга қарши кузатув мосламаларини жойлаштириш каби фаолиятларни амалга оширган.
АҚШ Туркия ва Ливандаги 3та компания ва 1 жисмоний шахсга нисбатан Ислом инқилоби корпуси қўриқчилари ва Ҳизбуллоҳни молиявий қўллаб‑қувватлагани учун санкция киритди. Улар Эрон хомашёси товарларини жаҳон бозорида харид қилиш, ташиш ва сотишда айбланган.
АҚШ Давлат департаменти Туркияга 40 дона F-16 Block қирувчи самолётини сотиш, мавжуд 79 та F-16 ни модернизация қилиш ва уларга эҳтиёт қисмлар етказиб бериш бўйича расмий хабарнома жўнатди. Туркия Швециянинг НАТОга қўшилишини маъқуллагани ортидан ушбу қарорга Конгресс томонидан рухсат берилиши эҳтимоли катта.
Туркия Буюк Миллат Мажлиси (ГНТА) Бош Ассамблеясида Швециянинг НАТОга кириши ҳақидаги протоколни ратификация қилишни маъқулловчи қонун лойиҳаси қабул қилинди. 346 депутатдан 287 нафари Швециянинг НАТОга кириши ҳақидаги протоколни ратификация қилиш учун овоз берди.