Охирги вақтларда соқоли бор фуқароларимиз ҳуқуқни муҳофаза қилувчи органлар томонидан сўроқ қилиниб, соқоллари олдирилаётгани ҳақидаги хабарларни кўп эшитяпмиз. Бунинг асл сабаби нима? Соқол қўйган эркакларнинг юқоридагиларга ёқмаслигими?! Ёки бу ҳам бир исломофобиянинг кўринишими?!

АҚШ "Террорга қарши кураш" шиори билан дунёнинг барча давлатларига исломофобияни экспорт қилишга муваффақ бўлди. 2001 йил 11 сентябрда Нью Йорк шаҳридаги Жаҳон савдо марказининг эгизак миноралари ва Вашингтондаги Пентагонда содир этилган террор хуружларидан 23 йил ўтиб, дунёнинг катта қисмида мусулмонлар ва ислом динига нисбатан эҳтиёткорлик, камситиш, бегонасираш ва ҳатто душманликкача айланиб кетган ҳаракатларга зўравонлик ҳам қўшилди, дейиш мумкин.

Ҳиндистоннинг Уттар-Прадеш штатида ресторанлар учун барча ходимларнинг исм-шарифларини оммага кўринарли жойга жойлаштириш талаби жорий қилинди. Бу эса диний жамоалар ўртасида тез-тез содир бўлиб турадиган можароларда мусулмонларни осонгина нишонга айланишларига хизмат қилади. Айрим ресторанлар мусулмон ходимларининг хавфсизлигини ўйлаб, уларни ишдан бўшатишга мажбур бўлмоқда.

Францияда мусулмон фаол мамлакат ҳукуматини исломофобияга берилиб кетганликда очиқ танқид қилгани учун судга тортилди. Ильяс Д’Имзален «Интифада» (Исроилга қаршилик) атамасини омма олдида ишлатгани ва сионизмни танқид қилгани учун 15 йилгача қамоқ жазосига ҳукм қилиниши мумкин.

Британиялик ашаддий исломофоб Томми Робинсон суриялик муҳожирга қарши туҳмат иши бўйича судда ютқазганидан сўнг суд тақиқини қайта-қайта бузгани учун 18 ойга қамалди.

ЕИ асосий ҳуқуқлар агентлиги томонидан ўтказилган сўров натижаларига кўра, минтақада яшовчи қарийб ҳар икки мусулмондан бири ирқчилик ва камситиш ҳолатларига дуч келмоқда. Айниқса Европада туғилган ёш мусулмонлар ва исломий либосда юрувчи аёллар кўпроқ ирқчилик ва камситиш қурбонига айланишмоқда.

Совет Иттифоқида Исломга қарши кўп қиррали уруш олиб борилган. Бу уруш ҳам мафкуравий, ҳам репрессив чораларни ўз ичига олган. Шунга қарамай, худосизлар ғолиб бўлишмади. Аллоҳ Таоло айтганидек: "Улар Аллоҳнинг нурини оғизлари билан ўчирмоқчи бўлурлар. Ҳолбуки, Аллоҳ, кофирлар ёқтирмаса ҳам, Ўз нурини тугал этгувчидир". ("Тавба" сураси 32-оят)

Голландиялик яҳудий журналист Ева Принс Нидерландия Европада мусулмонларга қарши кайфият (исломофобия) энг кўп тарқалган давлатлардан бири экани, улар яҳудийларга қараганад кўпроқ камситилишини маълум қилди. У яқинда Амстердамда содир бўлган воқеаларни яҳудийлар бошлагани, бироқ ҳукумат ҳодисани "антисемитизм" сифатида баҳолаганини таъкидлади.