Океанлар сатҳида кунлик ўртача ҳарорат рекорд даражада кўтарилди. Авваллари 20 йилда кузатилган ҳарорат кўтарилиши 2023 йилнинг ўзида қайд этилди. Денгиз сувининг илиши сув остидаги экотизимининг ўзгаришига, кучли тропик бўронларнинг вужудга келишига сабаб бўлмоқда.

АҚШ Океан ва Атмосфера тадқиқотлари миллий бошқармаси (NOAA) ҳисоботига кўра, июль ойи рекорд даражада иссиқ бўлди. Шунингдек, Ер юзида кетма-кет 14 ойдирки ҳарорат кўтарилиши қайд этилмоқда.

Ўтган йили Европада кузатилган рекорд даражадаги иссиқ ҳаво туфайли 50 мингга яқин киши ҳаётдан кўз юмди. 2023 йилда жазирама билан боғлиқ ўлимлар Грецияда энг юқори даражага етган – ҳар миллион кишига 393 та ўлим, Италияда бу кўрсаткич 209 та, Испанияда 175 тани ташкил этган. Айни пайтда қитъа дунёнинг бошқа қисмларига қараганда тезроқ исимоқда.

Жаҳон метеорология ташкилоти 2024-2025 йиллар қишида қаттиқ совуқ тушиши ва қор бўронлари бўлиши мумкинлигидан огоҳлантирди. Бу ёз ойларини кузатувлар тарихидаги энг иссиқ бўлишига хизмат қилган Эл-Ниньо иқлим ҳодисаси ўрнини Ла-Нинья эгаллагани билан изоҳланди.

БМТ маълумотларига кўра, 2030 йилга келиб дунёда 3,3 миллиарддан ортиқ аҳоли тоза сув ва санитария таъминотидан маҳрум бўлиши мумкин. Дунё мамлакатларининг ярмида дарёлар, кўллар ва сувли қатламлар каби чучук сув экотизимлари бузилмоқда, дарёлар ва кўллар қурияпти, сувли қатламлар ҳаддан ташқари эксплуатация қилинмоқда. Бу эса ҳар йили ер ости сувлари сатҳининг кескин пасайишига олиб келмоқда.