Ислом тараққиёт банки “Шариат меъёрлари бўйича арзон уй-жойларни молиялаштириш” лойиҳаси доирасида Қирғизистонга 79 миллион доллар ажратади. Қирғиз ҳукумати лойиҳа туфайли минглаб оилалар арзон уй-жойлар билан таъминланишини маълум қилди.
Россиянинг Санкт-Петербург шаҳрида ўзбекистонлик меҳнат муҳожири бир неча кишини ёнғиндан қутқариб қолди.
Туркий давлатлар қўшма кичик CubeSat сунъий йўлдошини ишлаб чиқиш учун махсус муҳандислар гуруҳини тузишни режалаштирмоқда. Мазкур жамоа ўз фаолиятини Қозоғистондаги тадқиқот марказида амалга оширади.
Қирғизистон Озарбайжоннинг Арманистон ишғолидан озод қилинган Агдам тумани Хидирли қишлоғида ўз ҳисобидан мактаб қуради. Садир Жапаров ва Илҳом Алиев биргаликда ушбу мактабнинг тамал тошини қўйди. Давлат раҳбарлари Агдам шаҳрининг қайта тикланган тарихий Жума масжидининг очилиш маросимида ҳам иштирок этишди.
Ражаб Тоййиб Эрдўғоннинг Ироққа ташрифи доирасида Туркия, Ироқ, Қатар ва БАА ўртасида Шарқ ва Европа мамлакатларини боғловчи энг қисқа йўлни барпо этишни кўзда тутган “Тараққиёт йўли” лойиҳасини амалга ошириш бўйича англашув меморандуми имзоланди. Ушбу йўлнинг Хитой ва Европа ўртасидаги масофани Сувайш канали орқали ўтадиган денгиз йўлига нисбатан қисқартириб, вақт ва маблағни тежаши кутилмоқда.
Қирғизистоннинг жанубий вилоятларида селга қарши тўғон бузилиши натижасида аҳоли зудлик билан эвакуация қилинмоқда. Камида бир киши ҳалок бўлган.
Британия ташқи ишлари вазири Дэвид Кэмерон Марказий Осиё давлатлари ва Мўғилистонга ташрифини бошлади. Британия ТИВ раҳбари илк бор Тожикистон ва Қирғизистонда бўлди. Ўзбекистонга эса охирги марта 1997 йилда ташриф буюрган.
Ўзбекистон президенти Шавкат Мирзиёев қисқа муддатли меҳнат таътилига чиқди. Туркия президенти Ражаб Тоййиб Эрдўғон эса 12 йиллик танаффусдан сўнг илк бор Ироққа бир кунлик ташриф билан бормоқда. Озарбайжон раҳбари Илҳом Алиев Россияга ташриф буюрди.
Қозоғистон жанубидаги Балхаш вилоятида жойлашган Иле-Балхаш давлат қўриқхонаси ҳудудида 18 гектар майдонда қуриган хас-чўплар ва қамишлар ёнди. Гидрометеорология хизмати мамлакат жанубида ҳарорат май ойидаёқ 40 даражага кўтарилиши, бу эса, ўз навбатида, ёнғинлар хавфини янада оширишини тахмин қилмоқда.
Арманистон Тавуш вилоятидаги тўртта қишлоқни Озарбайжонга ўтказадиган бўлди. Арманистон бош вазири девони ушбу қарорни изоҳлар экан, бу чегарадаги хавфсизликка таҳдидларни камайтиришини маълум қилди.