Туркий давлатлар қўшма CubeSat сунъий йўлдошини ишлаб чиқади

Туркий давлатлар ташкилоти қўшма кичик CubeSat (Кубсат) сунъий йўлдошини яратиш учун махсус муҳандислар гуруҳини шакллантиришни режалаштирмоқда. Бу ҳақда Туркия космик агентлиги томонидан ташкил этилган Space Technology Conference анжумани доирасида Туркий давлатлар ташкилоти (ТДТ) космик агентликлари раҳбарларининг 3-йиғилишида иштирок этиш учун Анқарага келган ТДТ бош котиби ўринбосари Мирвоҳид Азимов Anadolu агентлигига маълум қилди.

Азимовнинг таъкидлашича, учрашув жуда самарали ва муваффақиятли ўтган. Мазкур учрашувда, шунингдек, иккинчи Туркия космик оромгоҳининг (Space Camp Turkiye) ўтказиш жойи бўйича фикр алмашилган. Биринчи Space Camp Turkiye ўтган йили Бурса шаҳрида ўтказилган эди.

Бундай тадбир ёшларнинг космик фанлар бўйича хабардорлигини оширишга ёрдам беради, деди ТДТ бош котиби ўринбосари.

“Бошқа томондан, бундай тадбирлар ёшларни бирлашишга, ҳамжиҳатлик ва умумий келажакка ишончни мустаҳкамлашга имкон беради”, – деди у.

Фото: NASA томонидан ишлаб чиқилган CubeSat намунаси.

CubeSat лойиҳаси туркий давлатлар мутахассислари жамоаси томонидан амалга оширилади

Азимовнинг эслатишича, ўтган йили ТДТ туркий давлатларнинг қўшма сунъий йўлдошини яратишнинг техник жиҳатларини ўрганиш бўйича ишчи гуруҳ тузган.

“Биз ҳозир ушбу гуруҳ фаолияти натижаларини муҳокама қилмоқдамиз. Учрашувда туркий давлатлар номидан муштарак сунъий йўлдош устида иш олиб борувчи махсус муҳандислар гуруҳи тузишга келишиб олинди. Бу жамоа ўз фаолиятини Қозоғистондаги тадқиқот марказида давом эттиради”, — деди Азимов.

Бош котиб ўринбосарининг сўзларига кўра, ТДТ иштирокчи-давлатлари ўз мутахассисларини Қозоғистонга жўнатади ва у ерда улар гуруҳ таркибида тадқиқот ишлари билан шуғулланади.

“Бизнинг асосий мақсадимиз ОТГ номидан CubeSat`ни ишга туширишдир. Мақсад – иштирокчи мамлакатлардаги экологик шароитларни ўрганиш ва қатор тадқиқотлар ўтказиш”, — деди у.

CubeSat - ўлчамлари 10х10х10 см, вазни 1,33 кг дан ошмайдиган космик тадқиқотлар учун кичик сунъий Ер сунъий йўлдоши.