13.02.2025 10:14
182
Трамп ва Путин телефон орқали Украина можаросини ҳал этиш бўйича келишиб олди
12 февраль куни АҚШ президенти Дональд Трамп ва Россия президенти Владимир Путин телефон орқали қарийб бир ярим соат давом этган суҳбат ўтказишди. Давлат раҳбарлари Украинадаги можарони муҳокама қилиб, уни тинч йўл билан ҳал этиш зарурлигини таъкидлашди.
Томонлар ўз жамоаларига зудлик билан музокараларни бошлашни топширишга келишиб олди. Суҳбат давомида Трамп ва Путин Яқин Шарқдаги вазият, энергетика, сунъий интеллект ва долларнинг мустаҳкамлиги масалаларини ҳам муҳокама қилишди.
Кремль ва Вашингтон расмийлари суҳбатда Россия ва АҚШ ўртасидаги фуқароларни алмашиш масаласини ҳам муҳокама қилганини маълум қилди. Россия президенти матбуот хизматига кўра, Путин ва Трамп ўзаро ташрифлар ташкил этишга келишиб олган.
Суҳбатдан сўнг, Трамп Украина президенти Владимир Зеленскийга қўнғироқ қилиб, музокаралар жараёни бошланиши ҳақида хабар берди.
Президент Трамп сайловолди чиқишларида Путин билан учрашиб, Украина можаросини бир кунда ҳал қилишини айтган эди. Музокарага рози бўлган Путин бир қатор талабларни қўйишни режалаштирган.
