Moskva yaqinidagi “Krokus Siti Xoll” kontsert zalida sodir boʻlgan teraktdan keyingi kunlarda Rossiya boʻylab begunoh tojik muhojirlari tahdidlar, ogʻzaki haqoratlar va huquq-tartibot idoralarining eʻʻtibori ortgan. Nafaqat tojikistonliklar, balki Markaziy Osiyo diasporasining boshqa vakillariga ham diskriminatsiya kuchaygan.

“Krokus” voqealaridan soʻng Rossiyada islomofobiya va tojiklarga qarshi nafrat hodisalari ortishi ortidan tojikistonliklar ommaviy ravishda Rossiyaga safarlarini bekor qilmoqda. Rossiya aviakompaniyalari yoʻlovchilar oqimi keskin kamaygani sababli Tojikistondan RFga parvozlar sonini qisqartirmoqda.

Tojikistonlik 23 yoshli yigit harbiy xizmatdan boʻyin tovlagani uchun Rossiya fuqaroligidan mahrum etildi. Uning pasporti musodara qilingan va tez orada mamlakatdan chiqarib yuboriladi.

Turkiyaning Dushanbedagi elchixonasi Tojikiston fuqarolari uchun viza tartibi joriy etilishi boʻyicha qoʻshimcha maʻʻlumotlarni eʻʻlon qildi. Unga koʻra, viza zarurati vaqtinchalik chora boʻlishi mumkin.

Moskvadagi qurilish maydonida qurilish materiallarining notoʻgʻri taqsimoti sababli Oʻzbekiston va Tojikiston fuqarolari ommaviy mushtlashdi. Natijada 10 nafar oʻzbekistonlik va 13 nafar tojikistonlik mehnat muhojirlari qoʻlga olindi. Hodisada hech kim jabrlanmagan.

Yuzlab tojikistonliklar bir necha kundan buyon Rossiya-Qozogʻiston davlat chegaralari oʻrtasidagi betaraf hududda qolib ketmoqda. Rus chegarachilari tizimda nosozlik roʻy berganini aytib, ularni ortga qaytarmoqda, ayni paytda bolalar, 60 yoshdan oshganlar va boshqa davlatlar fuqarolarini oʻtkazib yubormoqda. Ortga qaytmoqchi boʻlganlardan esa qozoq chegarachilari Rossiyaga kiritilmagani toʻgʻrisida hujjat talab qilib, oʻtkazmayapti.

Mingga yaqin Tojikiston fuqarosi Moskvaning bir qancha aeroportida qolib ketmoqda. Ular orasida Rossiya hukumati hisobidan tahsil olayotgan tojik talabalari ham bor. Uzoq kutishlardan soʻng ularning bir qismi – 322 nafari RF hududiga kiritilgan boʻlsa, 306 nafarini mamlakatdan chiqarib yuborish rejalashtirilgan. Tojikiston TIV fuqarolarni Rossiyaga safar qilishdan tiyilishga chaqirmoqda.

AQShda sakkiz nafar tojikistonlik IShIDga aloqadorlikda gumonlanib hibsga olindi. Qayd etilishicha, tojikistonliklar bir muncha vaqt davomida Federal qidiruv byurosi (FQB) kuzatuvida boʻlgan va soʻngra hibsga olingan.