Мисрнинг Сувайш канали бўйлаб юк ташиш нархи тўққиз баробарга ошиб, бир контейнер учун 6800 долларгача кўтарилди. Инқироздан аввал 750 доллар эди.

Дунёнинг 18-энг йирик иқтисодиётига эга Миср фунти 60 фоизга қадрсизланди, Марказий банк асосий ставкани 600 базис пунктига ёки 27,25 фоизгача оширди. ХЖВ мамлакатга 8 млрд доллар фавқулодда кредит ажратмоқчи. Мисрдаги бу каби муаммолар дунё ва минтақа учун нимаси билан хавфли? Дастлабки хулосалар ва прогнозлар қандай?

Минтақада содир бўлаётган воқеалар Миср манфаатларига бевосита зиддир. Мамлакат шимолий-шарқда Ғазо, жанубда Судан, ғарбда Ливия ва шарқда Қизил денгиз сингари беқарорлик ҳудудлари ўртасида қолиб кетган. Қизил денгизда Яман ҳусийларининг Исроил портлари сари йўл олган ёки қайсидир маънода ишғолчи давлатга алоқадор юк кемаларига ҳужумлари халқаро юк ташиш ҳажмига салбий таъсир қилиб, Сувайш канали даромадлари камайишига олиб келди.

Халқаро валюта жамғармаси Қизил денгизда Яман ҳусийларининг Исроилга алоқадор кемаларга ҳужум қилиши оқибатида Мисрнинг Сувайш каналидан оладиган даромади 70 фоизгача тушганини маълум қилди. Шу билан бирга, ХВЖнинг Мисрдаги иқтисодий илоҳотларни қўллаб-қувватлашга 8 млрд доллар кредит ажратиш тўғрисидаги қарори мамлакатда товар ва хизматлар нархининг ошишига олиб келди.