Фаластин Гилан Ваҳба Абдалмажидни Ирландиядаги биринчи элчиси этиб тайинлади. Илгари у Фаластиннинг Ирландиядаги миссиясига раҳбарлик қилган.

Шимолий Ирландия полицияси Доун графлигидаги масжидга ҳужум қилган исломофоб жангари шахсни аниқлаб, ҳибсга олди. У асосан бангладешликлар борадиган масжид биносига молотов коктейлини улоқтирган, бироқ мўъжизавий тарзда ёнғин чиқмаган.

Норвегия ортидан дарҳол Ирландия ҳам Фаластин давлатини расман тан олганини эълон қилди. Улар ортидан Испания бормоқда – бу ҳақдаги қарори 28 майдан кучга киради. Словения эса ўз қарорини 13 июнь куни эълон қилиши кутилмоқда. Бельгия ва Франция ҳам бу қадамни ташламоқчи.

Ирландия бош вазири Лео Варадкар АҚШ президенти Жо Байден билан учрашувда ирландияликларнинг фаластинликлар билан ўхшаш жиҳатлари ҳақида гапирди. “Уларнинг кўзларида ўз ўтмишимизни кўрамиз: мажбурий кўчирилиш, мол-мулкдан маҳрум этилиш, шубҳа остига олинган ва рад этилган миллий ўзига хослик, камситилиш ва ҳозир очарчилик ҳикоясини”, - деди у.

Ирландия бош вазири Европа Иттифоқи Ғазо секторидаги воқеалар бўйича қатъий ва ягона позицияни эгаллай олмагани учун ўзига бўлган ишончни йўқотганини таъкидлади.