Исроилнинг Шин Бет хавфсизлик агентлиги раҳбари Ронен Бар Ғарбий Соҳилда яҳудий келгиндилар террори назоратдан чиқиб кетгани учун бош вазир Беньямин Нетаняху, миллий хавфсизлик вазири ИТамар Бен-Гвир ва бошқаларни танқид қилди. Бар Ғарбий Соҳилда “Тепалик ёшлари” деган ном билан танилган, фаластинликларга қарши қотиллик, ўт қўйиш ва қўрқитиш кампаниясини олиб бораётган яҳудий экстремистларнинг хатти-ҳаракатларини жиноят сифатида эмас, балки терроризм сифатида таснифлаш кераклигини айтди.

Испания ташқи ишлар вазири Хосе Мануэл Албарес ўз мамлакати Ғарбий Соҳилдаги “12 тажовузкор исроиллик кўчманчилардан иборат биринчи гуруҳ”га қарши санкция жараёнини бошлаганини маълум қилди. “Сукут ва ҳаракатсизлик ҳар доим жабрдийдаларнинг зарарига ишлайди”, деди мусулмон давлатларда йўқ журъат ва иродани намоён этаётган Испания вакили.

АҚШ президенти Жо Байден босиб олинган Ғарбий Соҳилда фаластинликларга қарши зўравонлик қилган экстремист яҳудий кўчманчиларга қарши санкциялар жорий этиш тўғрисидаги фармонини имзолади. Бу ҳақда Оқ уйнинг ёзма баёнотида сўз боради.