Шин Бет раҳбари: Ғарбий Соҳилда яҳудий терроризми назоратдан чиқиб кетди

Исроилнинг Шин Бет хавфсизлик агентлиги раҳбари мамлакат раҳбариятини Ғарбий Соҳилдаги яҳудий терроризми назоратдан чиқиб кетгани ва миллий хавфсизликка жиддий таҳдидга айлангани ҳақида огоҳлантирди, деб ёзади The Guardian нашри.

Ронен Бар бу ҳақда бош вазир Беньямин Нетаняху, бош прокурор ва Исроил вазирлар маҳкамаси аъзоларига йўллаган мактубида ёзган. Уларнинг баъзилари зўравонликларнинг кучайишига сабабчи бўлаётган экстремист келгиндиларнинг очиқ тарафдорлари.

Танқид қилинганлардан бири – миллий хавфсизлик вазири Итамар Бен-Гвир Шабак бошлиғини ишдан бўшатишга чақирди. Бироқ бу жума куни мудофаа вазири Йоав Галлантнинг танбеҳига сабаб бўлди.

Барнинг мактубида диққат Ғарбий Соҳилда “Тепалик ёшлари” деган ном билан танилган, фаластинликларга қарши қотиллик, ўт қўйиш ва қўрқитиш кампаниясини олиб бораётган зўравон жангарилар, яҳудий экстремистларга қаратилган.

Бар уларнинг хатти-ҳаракатларини жиноят сифатида эмас, балки терроризм сифатида таснифлаш кераклигини айтган.

“Бу жиноят эмас, чунки бу қўрқитиш зўравонликдан фойдаланишдир. Бу террор”, - деб ёзган у. Жангарилар “чақмоқлардан уруш қуролларига” ўтишди, деган хавфсизлик бошлиғи бу қуролларнинг бир қисми давлат томонидан тақдим этилганини қўшимча қилган.

Террор кампанияси, дейилади мактубда, "яҳудийлик ва барчамиз учун катта доғ бўлди".

Шин Бет директори ўтган ой Бен-Гвирнинг Қуддусдаги исломнинг энг муқаддас жойи бўлган ал-Ақсо масжиди ва Қуббатус-Сахра мажмуасига келганида кўрсатган "томоша"си ҳақида гапирди. Маъбад тоғи яҳудийлар учун ҳам муқаддасдир, бироқ ўнлаб йиллар давомида яҳудийлар унга кириши мумкин бўлса-да, у ерда фақат мусулмонлар ибодат қилишига келишилган эди. 18 июль куни у ерда Бен-Гвир камералар олдида ибодат қилиб, ҳолатни бутунлай ўзгартиришга ваъда берди.

Барнинг огоҳлантиришича, бундай ҳаракатлар "кўп қон тўкилишига ва давлат қиёфасини таниб бўлмас даражада ўзгартиришга" олиб келиши мумкин.

Миллатчи раҳбарият, дея хулоса қилган Бар ўз мафкураси номидан "давлат хавфсизлиги ва унинг мавжудлигини хавф остига қўйишга тайёр эди".

Н12 нашрининг хабар беришича, Бен-Гвир Барнинг мактубидан кейин Исроил хавфсизлик кабинети йиғилишини тарк этган ва уни ишдан бўшатишга чақирган.

Нетаняху ҳали Барни ишдан бўшатишни гапирмаса-да, бироқ Шабак раҳбари ва ташқи жосуслик агентлиги Моссад директори Девид Барнини Ғазо тинчлик музокараларидаги фаолияти учун танқид қилиб, улар ҲАМАС томонидан гаровга олинганларни озод қилиш бўйича келишув учун Исроил хавфсизлигини қурбон қилишга тайёр эканликларини билдирган.

Бироқ Бар ва Бен-Гвир ўртасидаги жанжалда Нетаняху хавфсизлик вазири тарафини олди.

Барнинг ўтган ҳафта юборилган, лекин пайшанба куни кечқурун Исроилнинг 12-янгиликлар канали томонидан нашр этилган мактуби Нетаняху коалициясининг ўта ўнг қаноти ва Исроил хавфсизлик аппарати ўртасидаги кенг ва кескин тафовутни очиқлайди.