Исроил Қатарга зарба бериб, АҚШнинг "обрўси"ни тўкди – экспертлар

Кеча Исроил Қатарда ҲАМАС раҳбариятининг юқори мартабали аъзоларига зарба берганди. Дастлаб Доҳадаги ҳаракат вакилларининг тақдири номаълум эди.

Кейинчалик Ғарб нашрлари ушбу ҳужум оқибатида ҲАМАСнинг бош музокарачиси Ҳалил ал-Ҳайянинг ўғли ва унинг офис-менежери ўлдирилгани ҳақида ёзди. Шунингдек, Қатарнинг хавфсизлик ходими ҳам ҳалок бўлган.

Экспертлар Исроил бош вазири Нетаняху Доҳага ҳужумни ўз зиммасига олган бўлса-да, бу воқеа АҚШнинг минтақадаги обрўсига кучли зарба бўлиши мумкинлигини айтишмоқда.

Қайд этилишича, Қатарда АҚШнинг энг йирик ҳарбий базаси — Ал-Удейд жойлашган. Ана шу стратегик объект жойлашган ҳудудда йирик хорижий махсус операция ўтказилгани АҚШнинг иттифоқчи давлат хавфсизлигини таъминлашдаги ожизлигини кўрсатади. Форс кўрфази давлатлари — Саудия Арабистони ва БАА учун ҳам бу аниқ сигнал: Америка хавфсизлик тизимлари ва ўзаро ёрдам шартномалари яқин иттифоқчилари қаршисида ишламайди.

Исроилнинг бундай қадамлари АҚШнинг дипломатик ташаббусларига ҳам зарар етказиши мумкин. Хусусан, Қатар асосан гаровдагиларни озод қилиш ва ўт очишни тўхтатиш бўйича музокараларда воситачи ролини бажараётган эди. Кечаги зарба эса айнан қатарлик воситачилар ва ҲАМАС раҳбарлари АҚШнинг навбатдаги сулҳ таклифини муҳокама қилаётган пайтда берилди.

Вашингтон оғир ҳолатда қолди: ёки АҚШ маъмурияти воқеадан бехабар бўлиб, Исроилни тўхтата олмаган, ёки хабардор бўлиб, қатарликларни огоҳлантиришни истамади. Ҳар иккала вазиятда ҳам АҚШ ўз иттифоқчисини назорат қила олмайдиган ёки ўзи хиёнаткорона сиёсат юритаётган давлат сифатида кўринмоқда.

Шуни ҳам унутмаслик керакки, ҲАМАС сиёсий бюроси Доҳада айнан Обама маъмуриятининг кўмаги билан очилган эди. Бундан ташқари, ҲАМАС Сиёсий Кенгаши таркибида АҚШ фуқаролари ҳам бор — бу эса Оқ Уй учун жиддий саволларни келтириб чиқаради (яъни, Трамп ўз фуқароларини ўлдиришга рухсат берган).