Туркия БМТ таснифига кўра аҳолиси “кекса” бўлган давлатлар тоифасига кирди. 2023 йил якунлари бўйича мамлакат аҳолисининг 10 фоиздан зиёди 65 ва ундан ошганлардан ташкил топди. Бу кўрсаткич 2060 йилга бориб 22,6 фоизга етиши кутилмоқда.
Қозоғистонлик ҳарбийлар БМТ тинчликпарвар кучлари таркибида Голан тепаликларида жанговар модулларни ўрнатиш ва топшириқларни бажаришга киришди.
Туркия президенти Ражаб Тоййиб Эрдўғон Анқара ёзгача террор таҳдидини йўқ қилиш ва Ироқ билан чегарадаги хавфсизликни тўлиқ кафолатлаш, шунингдек, Сурияда давом этаётган операцияларни якунлаш ниятида эканини маълум қилди
Amnesty International Россиянинг Қримни босиб олганига 10 йил тўлиши муносабати билан яриморолдаги демографик вазият бўйича ҳисоботини эълон қилди. Ташкилотнинг билдиришича, Россия расмийлари сўнгги ўн йил ичида таълим, дин, оммавий ахборот воситалари ва суд тизими каби соҳалардаги кўплаб чекловлар орқали украин ва қрим-татар идентификациясини йўқ қилишга уринмоқда.
Қозоғистон ва Туркия Каспий денгизида хавфсизликни таъминлаш соҳасида ўзаро ҳамкорлик бўйича келишувга эришди. Ушбу ҳамкорлик, жумладан, нефть тўкилиши, кема ҳалокати ва ёнғинларида тезкор чора кўриш имконига эга “профессионал фавқулодда қутқарув хизмати”ни яратиш, денгиз ва қуруқликда турли операцияларни амалга оширишда зарур замонавий технологияларни тақдим этишни кўзда тутади.
Эронда энг қадимги туркий тиллардан бири ҳисобланган халаж тили унда сўзлашувчилар сони камайиб бораётгани сабабли йўқ бўлиб кетиш арафасида. Шу боис халаж тили Эроннинг номоддий миллий мерос рўйхатига киритилди. Маълумотларга кўра, бугунги кунда 19 мингга яқин киши ушбу тилда сўзлашади.
Истанбулдаги собиқ Отатурк аэропорти терминали ҳудудида дунёдаги энг катта технопарк очилади. Бу ерда болалар ва ўсмирлар дастурий таъминот, фан ва техника бўйича бепул ўқитилади, болаларга турли тажрибаларни амалга ошириш учун шароитлар яратилади. Олимлар, муҳандислар, тадбиркор ва талабалар ўртасида ҳамкорликни ривожлантириш, инновациялар учун муҳит яратилади.
Қозоғистоннинг QAZAQ AIR авиакомпания Ўзбекистонга мунтазам парвозларни амалга оширишга рухсат олди. Рухсатнома 13 март куни Туркистон-Самарқанд-Туркистон йўналишида авиақатновларни йўлга қўйиш учун берилди.
АҚШ Россияга қарши санкцияларнинг Марказий Осиё давлатларига салбий таъсирини юмшатиш устида ишлашда давом этиш, минтақа билан савдо ҳажмини ошириш ва у ерга сармоя оқимини оширишга тайёрлигини билдирди.
Озарбайжон 2024 йил 13 мартда Европарламентда қабул қилинган “Европа Иттифоқи ва Арманистон ўртасидаги яқин алоқалар ҳамда Озарбайжон ва Арманистон ўртасида тинчлик битими зарурлиги тўғрисида”ги резолюция асоссиз ва нохолис, икки томонлама стандартнинг яққол намунаси деб атади.