ТИВ: "Ўзбекистон фуқаролари дунёнинг исталган нуқтасида давлат ҳимоясида"

"Ўзбекистон Конституцияси, миллий қонунлар ва халқаро ҳуқуқнинг умумэътироф этилган принциплари ҳамда нормаларига асосан, Ўзбекистон фуқаролари дунёнинг исталган нуқтасида бўлишидан қатъи назар, давлат ҳимоясида эканини таъкидлайди", дейилади вазирлик баёнотида. 

Қайд этилишича, агар фуқароларнинг ҳуқуқлари, эркинликлари, қонуний манфаатлари ёки қадр-қиммати хорижда бузилса, улар дарҳол қабул қилувчи давлатнинг ваколатли ҳуқуқ-тартибот органларига мурожаат қилишлари зарур. 

Шунингдек, ТИВ фуқаролар Ўзбекистоннинг дипломатик ваколатхоналари ёки консуллик муассасаларига ҳуқуқий ва консуллик ёрдами сўраб мурожаат қилиши мумкинлигини билдирган. 

"Фуқароларимизни хорижда ҳимоя қилиш давлат сиёсатининг муҳим йўналиши эканини ҳамда бу масъулият давлатнинг ўз фуқаролари олдидаги мажбуриятлари асосида амалга оширилишини яна бир бор эслатиб таъкидлаймиз", дейилади баёнотда. 

Олдинроқ, ижтимоий тармоқларда россиялик шахс ўзбекистонлик меҳнат муҳожири – такси ҳайдовчисини ҳақорат қилаётгани акс этган видео тарқалганди. Видеода россиялик кимса ҳайдовчига: "Сен русларнинг қулисан! Ўзбекистонда ҳеч нарса йўқлиги учун бизнинг хизматимизни қилишга келгансан", дея куракда турмайдиган сўзлар билан ҳақорат қилганди. Ушбу тасвирлар ижтимоий тармоқларда кенг муҳокамаларга сабаб бўлди.