Қирғизистон ва Қозоғистонда кучли зилзила содир бўлди

4 март, душанба куни Қирғизистонда 6 магнитудали зилзила содир бўлди. Бу ҳақда Қирғизистон Миллий фанлар академияси Сейсмология институти хабар бермоқда.

Ер силкинишлари маҳаллий вақт билан 12:22 да қайд этилган.

Зилзила манбаи Чўлпон-Ота шаҳридан 35 км шимоли-ғарбда, Олмаотадан 40 км жанубда, Бишкекдан 190 км шимолда жойлашган.

Қозоғистон Фавқулодда вазиятлар вазирлиги маълумотларига кўра, 4 март куни Олмаотадан 31 км жанубда 6,1 магнитудали зилзила содир бўлган.

Ер силкинишлари маҳаллий вақт билан 11:22 да қайд этилган. Олмаотада 5 магнитудали зилзила сезилди.

Қурбонлар, вайронагарчилик ва жароҳатлар ҳақида ҳозирча маълумот йўқ.