23.05.2024 15:33
Нуман Куртулмуш: Турк дунёси янги куч марказига айланади
Туркия Буюк Миллат Мажлиси раиси Нуман Куртулмуш Ўзбекистонга ташрифи аждодлар диёрида экани учун қулайлик ҳисси билан кечаётгани ва делегациясига кўрсатилган самимий меҳмондўстлик учун миннатдорлик билдирди. Шунингдек Турк дунёсининг бирлиги ва ривожланишининг тинчлик ва барқарорликка ҳисса қўшишини таъкидлади.
Туркия парламенти раҳбари самарали музокаралар ҳақида сўзлаб берди, унда Туркия ва Ўзбекистон муносабатларини мустаҳкамлашга қаратилган қадамлар муҳокама қилинди.
У Туркия президенти Ражаб Тоййиб Эрдўғон ва Ўзбекистон президенти Шавкат Мирзиёев ўртасидаги қардошлик муносабатлари туфайли бошланган бу қадамлар парламент томонидан қўллаб-қувватланиши муҳимлигини таъкидлади.
Куртулмуш Ўзбекистондаги ислоҳотларнинг муваффақиятига умид билдирди, унинг сўзларига кўра, илм-фан, санъат, маданият, адабиёт, технология ва инновация соҳаларида кучли давлат барпо этилишига олиб келади.
У Туркия ва Ўзбекистон узоқ масофаларга қарамасдан яқин ҳамкорликни давом эттиришини, бу эса парламент дипломатияси томонидан қўллаб-қувватланишини таъкидлади.
Шунингдек, Ўзбекистон ва Туркия ўртасидаги муносабатларни мустаҳкамлаш халқаро соҳада ҳар икки давлатга ҳам манфаат келтириши таъкидланди.
“Турк дунёсининг салоҳияти, жумладан инсон ресурслари ва табиий бойликлари, чуқур тарихий ва маданий алоқалари келажакда янги куч марказига айланишига имкон беради”, - деди Куртулмуш.
Парламентлар ўртасида ишчи гуруҳ ташкил этилиши ҳақидаги саволга Туркия парламенти келгусидаги қадамларни муҳокама қилиш учун ҳам Қонунчилик Мажлисига, ҳам Сенатга вакиллар тайинлашини айтди.
Унинг қайд этишича, 2017 йилда имзоланган шартнома янгиланади ва уч парламент раислари келгуси ҳамкорликни муҳокама қилиш ва қарор қабул қилиш учун учрашадилар.
Эслатиб ўтамиз, Куртулмуш Қозоғистонга ташрифи чоғида туркий халқлар дунё тинчлигининг кафолати эканини таъкидлаган эди.
“Турк дунёсининг кучайиб бораётганидан ҳеч ким ташвишланмасин ва ўзини ноқулай ҳис қилмасин.
Бу минтақада асрлар давомида турли этник ва миллий гуруҳлар билан тинч-тотув яшаб келаётган туркий жамоалар дунё тинчлигининг кафолатидир”, - деди у қозоғистонлик талабалар билан учрашувда.
