Жанубий Кореяда Исроил бош вазири, президенти ва бошқаларга қарши даъво қўзғатилди

Жанубий Кореяда Исроил бош вазири Беньямин Нетаняху, президент Исаак Герцог, ЦАХАЛ раҳбари Ҳалеви, мудофаа вазири Галлант, ташқи ишлар вазири Кац, молия вазири Смотрих ва миллий хавфсизлик вазири Бен Гвирдан иборат етти нафар юқори мартабали амалдорга нисбатан даъво қўзғатилди, дея хабар бермоқда Ynetnews.

Асосий айбловлар: геноцид, инсониятга қарши жиноятлар, инсонпарварлик ишларига қарши уруш жиноятлари ва Ғазода тақиқланган қурол ва маблағлардан фойдаланган ҳолда уруш жиноятлари.

Айбловлар Демократия учун халқ бирдамлиги ташкилоти томонидан илгари сурилган. Даъво аризасига 5000 дан ортиқ киши, жумладан, мамлакат Миллий ассамблеясининг икки аъзоси имзо чеккан. Даъво Исроил расмийларини Корея судлари ва мамлакатда суд қилиш учун Жанубий Кореяга экстрадиция қилишни талаб қилади.

“Айблов хулосаси шуни англатадики, 5000 га яқин даъвогар Ғазода геноцид содир этилганини тан олган. Улар нафақат мотам тутибгина қолмай, балки айбдорлар Жанубий Корея қонунчилигига мувофиқ қаттиқ жазоланишини талаб қилмоқдалар”, - дейди Ли Донг Хва, АДИ жамоаси менежери.