24.01.2025 15:45
376
Трамп: Зеленский урушни тугатиш бўйича музокараларга тайёр
АҚШ президенти Дональд Трамп Россия ва Украина ўртасидаги можаро якунланиши кераклигини қайд этиб, яқин кунларда Россия президенти Владимир Путин билан учрашиш ниятида эканини маълум қилди.
Оқ уйда журналистлар саволларига жавоб берар экан, Трамп Украина президенти Владимир Зеленский урушни тўхтатувчи келишув бўйича музокараларга тайёрлигини айтди.
“Зеленский бу урушни тугатиш бўйича музокара олиб боришга тайёр. Украина ҳам, Россия ҳам жуда катта йўқотишларга дуч келди. Биз урушни имкон қадар тезроқ якунлашимиз керак,” — деди Трамп.
Трамп, шунингдек, Хитой раҳбари Си Цзинпин можарони тугатиш учун ўз таъсиридан фойдаланиши кераклигини таъкидлади. Унинг фикрича, халқаро ҳамкорлик бу муаммоларни ҳал қилишда муҳим аҳамиятга эга.
Ғазо секторидаги ўт очишни тўхтатишга оид вазият ҳақида сўзлаган Трамп ҳозирча барчаси муваффақиятли ўтаётганини таъкидлаб, минтақадаги вазият эҳтиёткорлик билан кузатилиши кераклигини айтди.
Шу билан бирга, у Ҳусийларни хорижий террор ташкилотлари рўйхатига киритиш масаласида ҳам фикр билдирди. Трампнинг таъкидлашича, Ҳусийлар халқаро хавфсизликка таҳдид солмоқда ва АҚШ бу хатти-ҳаракатларга қарши туриш ниятида.
