05.03.2025 15:44
234
Толибон: Зеленскийнинг аҳволи АҚШ иттифоқчиларига сабоқ бўлиши керак
Афғонистон Ислом Амирлигининг Покистондаги собиқ элчиси мулла Абдуссалом Заиф океан ортида Украина президенти Владимир Зеленскийга нисбатан муносабат ҳақида баёнот берди.
Собиқ дипломатнинг таъкидлашича, Зеленский Европа ва Америка манфаатлари учун ўз мамлакатини қурбон қилди ва халқини иккиюзламачиларнинг хайр-эҳсонига қаратиб қўйди. Заиф бу ишларнинг оқибатларига урғу бериб, Зеленский "яқиндагина Оқ уйдан жуда катта ҳурматсизлик билан ҳайдалганини" эслатиб ўтган.
У, шунингдек, Қўшма Штатларнинг иттифоқчиларини огоҳликка чақириб, сўнгги воқеалар уларга яхшигина дарс бўлиши кераклигини айтиб ўтган.
Эслатиб ўтамиз, Зеленский АҚШга ташрифи чоғида Оқ уйда президент Дональд Трамп ва бошқа АҚШ расмийлари билан учрашганди. Овал кабинетдаги учрашувда Украина етакчиси қаттиқ танқидга учради ва баҳслар ўзаро жанжал тусини олди. Шундан сўнг Зеленский АҚШ билан кутилган келишувни имзоламасдан, Оқ уйни тарк этишга мажбур бўлган.
