Қуддусда Исроил ҳукуматига қарши 100 минг киши норозилик намойишига чиқди

100 мингдан ортиқ одам Исроил парламенти – Кнессет олдида тўпланиб, ҳукумат истеъфосини талаб қилмоқда. Ушбу оммавий норозилик намойиши Исроил ва ҲАМАС ўртасида уруш бошланганидан бери энг йириги бўлди.  

Намойиш ташкилотчилари бош вазир Бенямин Нетаняху ва унинг ҳукуматини истеъфога чиқишга, мамлакатда муддатидан олдин сайловлар ўтказишга, Исроил раҳбариятини эса Ғазо секторида гаровда бўлган 130 нафар исроилликни озод қилишга олиб келадиган гаров келишувига рози бўлишга чақирди.

Намойишчилар якшанба куни кечқурун соат 19:00 атрофида бошланган намойиш олдидан Кнессетга йўл олди ва ҳукуматга қарши тўрт кунлик норозилик намойишини бошлади.

Кнессет биноси олдидаги йиғилиш, шу ҳафта Қуддусда тўрт кунлик норозилик намойишлари ва йиғилишларини режалаштираётган Каплан Форсе ва Бротҳерс ин Армс каби ҳукуматга қарши норозилик ҳаракатлари коалицияси томонидан бошланган.

Ташкилотчилар митингда 100 мингдан ортиқ, ОАВ эса ўн минглаб одамлар қатнашганини маълум қилди.

Нетаняхуга қарши гуруҳлар “Сен масъулсан, сен айбдорсан”, “Келишув (маҳбусларни алмашиш бўйича) ҳозир”, “Сайловлар ҳозир” каби шиорлар билан бош вазир Нетаняхуга юзланиб, ҳукумат истеъфосини талаб қилди.

Асосий норозилик намойиши тугагандан сўнг, баъзи иштирокчилар яқин атрофдаги «Бегин» шоссесини тўсиб қўйишди ва йўлда гулхан ёқишди, бироқ кейинроқ полициячилар уларни ҳайдаб чиқарди. Шу билан бирга, бошқа намойишчилар Қуддусга кириш йўлини Стринг кўприги яқинида тўсмоқчи бўлиб, ҳуқуқ-тартибот идоралари билан тўқнашди. Камида бир намойишчи ҳибсга олинган, дейди полиция.

Ҳукуматга қарши оммавий намойишдан сўнг намойишчилар Кнессет яқинида 100 дан ортиқ чодир қурди. Чодирлар қатори Кнессетдан Ташқи ишлар вазирлиги ўртасига қадар чўзилган. Шахсий уйқу чодирлари ёнида намойишда иштирок этган турли норозилик ҳаракатлари томонидан ўрнатилган каттароқ логистика чодирлари, шунингдек, Ём Киппур уруши фахрийлари олиб келган иккита ҳақиқий ўлчамдаги танклар макети ҳам бор.

Норозилик ҳаракатлари вакиллари бу ҳафта Қуддус бўйлаб тўрт кунлик митинг ва тадбирлар ўтказишни режалаштирмоқда.