Путиннинг Вьетнамга сафари: Россия Украинага ҳужумни кучайтирадими?
Россия президенти Владимир Путин Шимолий Корея ва Вьетнам сафарлари якунлари бўйича матбуот анжуманида чиқиш қилар экан, Украинадаги урушга оид бир неча баёнот берди. Бу ҳақда рус нашрлари маълум қилди.

Хусусан, Путин Россия қўшинларининг, Украина талаб қилаётганидек, ишғол этилган ҳудудлардан олиб чиқиб кетилиши “афтидан, ҳеч қачон рўй бермайди”, деган. Унга кўра, ғарб мамлакатлари сиёсатчиларининг Россияни “жанг майдонида стратегик мағлубиятга учратиш” истаги Кремлни фақатгина “охиригача бориш”га мажбур қилиши мумкин, холос.

“Ғарб мамлакатлари сиёсатчилари бизнинг стратегик мағлубиятимизга эришишни хоҳлаётганларини айтишмоқда, бироқ Россия учун бу ўз давлатчилигининг тугаганини англатади. Аҳвол шундай бўлганидан кейин "Нимадан қўрқишимиз керак, охиригача борганимиз яхши эмасми?” деган масала кўндаланг бўлади”, – дея иқтибос келтирган “Медуза” нашри Путиннинг сўзларидан.

Россия президенти ўз сўзида ҳозирда душман томонидан ядро қуроли қўлланилишига жавобангина ядровий қурол ишлатишни назарда тутадиган мамлакат ядровий доктринасига ўзгартишлар киритиш эҳтимоли ҳақида ўйлаётганини ҳам қўшимча қилган.

“Бироқ доктринада бизга превентив зарба керак эмас, биз жавоб зарбасида ҳам душманни йўқ қила оламиз”, – дея ўз сўзига аниқлик киритган Путин.

Шунга қарамай, Путин Украина бўйича музокаралар “эртагаёқ” бошланиши мумкинлигини ҳам истисно қилмаган, бироқ Россия бу ҳолда фронт чизиғидаги мавжуд вазиятдан келиб чиқишини айтган.

Россия президентининг сўзларига кўра, можарони тартибга солиш бўйича таклифлар “доимо амал қилмайди”, тўқнашув чизиғидаги вазиятдан келиб чиқиб ўзгариб туради.

“Агар Киев музокараларни бошлашни бизнинг қўшинларимизнинг олиб чиқиб кетилиши билан боғламоқчи бўлса, бу ҳеч қачон содир бўлмайди, чунки Киев режими ҳокимиятдан кетишни истамайди. Демак, Киевдагилар бизнинг қўшинларимиз ўша ерда қолаверишидан манфаатдор”, – деган Путин.

Путин Украинага қурол-яроғлар етказиб берилаётганига қарши Россия Ғарбга душманона кайфиятда бўлган бошқа давлатларга қуроллар етказиши мумкинлигини айтиб ўтган. Унинг фикрича, Ғарб давлатлари кейин бу қуроллардан қаерда ва кимлар фойдаланиши мумкинлиги ҳақида бош қотириши керак.

Эътиборлиси, Шимолий Кореяда бўлганидек, Вьетнамда ҳам икки давлат мудофаа соҳасидаги ҳамкорликни кенгайтиришга келишиб олган. Бу ҳақда  Россия давлат раҳбарининг Ханойга ташрифи якунлари бўйича икки давлат қўшма баёнотида келтирилган.

"Мудофаа ва хавфсизлик соҳасидаги ўзаро ҳамкорлик Россия-Вьетнам муносабатлари тизимида алоҳида ўрин тутади ва учинчи давлатларга қарши қаратилмаган. Бундай ҳамкорликнинг мақсади Осиё-Тинч океани минтақасида ва бутун дунёда тинчлик, барқарорлик ва ривожланишни таъминлашга ҳисса қўшишдир", дейилади ушбу ҳужжатда.

Маълумот учун, Шимолий Корея билан стратегик мудофаа шартномасини имзолаган Путин Вьетнамга борди. 20 июн куни у Ханойда Вьетнам президенти То Лам билан учрашди. Кейинроқ икки томонлама музокаралар ва имзоланган ҳужжатлар алмашинуви бўлиб ўтди. Жумладан, Вьетнам бош вазири Фам Мин Тин билан нонушта ва Вьетнам Коммунистик партияси Марказий қўмитаси бош котиби Нгуен Фу Чонг билан суҳбат форматида музокаралар ўтказилди. Бу Путиннинг Вьетнамга бешинчи сафари, у аввалроқ 2001, 2006, 2013 ва 2017 йилларда ушбу Осиё давлатига ташриф буюрган.

Совет Иттифоқи давридан бери Вьетнам Москванинг иттифоқчиси ҳисобланади. Хусусан, ушбу ташрифдан сўнг Ветнам Коммунистик партиясининг нашри ҳисобланган Nhan Dan газетаси Путин Ханойга "Украина инқирозидаги мувозанатли позицияси" учун миннатдорлик билдиргани ҳақида ёзди. 

AFP агентлигининг маълум қилишича, Москва ўнлаб йиллар давомида Вьетнамнинг энг муҳим қурол етказиб берувчиси бўлиб, 1995 йилдан 2023 йилгача импортнинг 80 фоиздан ортиғи унинг ҳиссасига тўғри келган. Бироқ, Украинада уруш бошланиб, Россияга қарши санкциялар кучайтирилгач, бу савдолар ҳажмига ҳам таъсир қилган.

Унга кўра, Россия ва Вьетнам "анъанавий ва янги хавфсизлик муаммоларига, жумладан терроризмга қарши курашда ҳамкорлик қилади". Икки давлат биргаликда қарши чиқмоқчи бўлган "анъанавий ва янги хавфсизлик муаммолари" қаторида "ҳудудий низолар" ва "ташқаридан давлат тўнтаришларини қўзғатиш" тилга олинган.

Икки давлат етакчилари, шунингдек, Вьетнамдаги Ядро фанлари ва технологиялари маркази лойиҳасини амалга оширишни тезлаштиришга келишиб олган.

Мавзуга алоқадор

Энг кўп ўқилган

Тавсия қилинган

Реклама