Германия Исроилга қурол етказиб беришда АҚШдан кейин иккинчи
Исроил Ғазо секторида инсониятга қарши жиноятларни содир этганликда айбланаётган бир вақтда Германия ушбу қотил давлатга энг кўп қурол етказиб бериш бўйича АҚШдан кейинги иккинчи ўринда турибди, деб ёзмоқда "Анадолу" агентлиги.
Стокгольм Халқаро тинчлик тадқиқот институти (SIPRI) маълумотларига кўра, 2023 йилда Германия 47 фоиз улуш билан Исроилга "оддий қуролларнинг асосий тоифалари" етказиб берувчисига айланди ва АҚШдан (53 фоиз) кейин иккинчи ўринга чиқди. 2003 йилдан бери Германия Исроилга оддий қуролларни импорт қилиш бўйича доимий равишда иккинчи ва баъзан биринчи ўринда туради.
Исроил армияси Германиянинг ThyssenKrupp кема қурувчиси томонидан яратилган кеманинг Ғазо секторида зарбалар бергани тасвирини эълон қилди. Бундан ташқари, ижтимоий тармоқларда исроиллик ҳарбийларнинг Matador RGW 90 гранатомётларидан фойдалангани тасвирлари пайдо бўлди, улар Германияда ишлаб чиқарилган двигателлар билан жиҳозланган. Буларнинг барчаси Исроил Германиядан сотиб олинган қуроллардан Ғазо секторида фойдаланаётганидан далолат беради.
Германия ҳукумати 2023 йилда Исроилга 326,5 миллион евро миқдорида қурол етказиб беришни маъқуллади.
Германия ҳукумати маълумотларига кўра, 2023 йилда Исроилга ҳарбий техника экспорти учун 308 та лицензия тасдиқланган бўлиб, умумий қиймати 327 миллион еврога яқин. Бу тасдиқланган лицензияларнинг умумий қиймати 32,3 миллион еврони ташкил қилган 2022 йилга нисбатан ўн баробар кўпдир.
Немис матбуотига кўра, 7 октябрдан 2 ноябргача бўлган вақт оралиғида атиги 26 кун ичида 185 та индивидуал экспорт рухсатномаси тасдиқланган.
2023 йил ноябрь ойида Германия ҳукумати “Ташқи ишлар вазирликлари, Иқтисодиёт вазирлиги ва экспорт назорати идорасидан иборат ишчи гуруҳ тузди, унга Исроилнинг қурол-яроғ сўровларини тезлаштириш вазифаси юкланди”.
2023 йилда Исроилга рухсат этилган индивидуал экспорт лицензиялари орасида ғилдиракли ва занжирли ҳарбий машиналар (65 лицензия), ҳарбий технология (57 лицензия) ва ҳарбий электроника (29 лицензия) мавжуд эди.
Исроилга экспорт қилиш учун рухсатномалар, шунингдек, инсон томонидан олиб бориладиган танкга қарши қуроллар, ҳаво ҳужумидан мудофаа тизимлари, алоқа ускуналари, торпедалар, ракеталар, портловчи моддалар, ўқ-дорилар, йирик калибрли қуроллар ва ўқ отиш қуролларини ўз ичига олган.
Германия Иқтисодий ишлар ва иқлимни муҳофаза қилиш вазири Роберт Хабек Исроил халқаро ҳуқуқни ҳурмат қилиши кераклигини айтди. “Очлик, Фаластин халқининг изтироблари ва Ғазо секторига қилинган ҳужумлар халқаро ҳуқуққа тўғри келмайди. Исроил у ерда ўз чегараларини кесиб ўтган. У бундай қилмаслиги керак”, деди у.
Бироқ, Хабекнинг баёнотларига қарамай, Германия қуролларининг Исроилга экспорти 2024 йилнинг биринчи 5 ойида ҳам давом этди.
.png)
Мавзуга алоқадор
-
Ғарб матбуоти аксарият ҳолатларда иккиланма мезонлар билан ҳаракат қиляпти ва шу тахлит яшамоқда. Абдулҳаким Баҳриддин Ғазо мисолида ахборот воситаларидаги иккиланма мезонларни тилга олди.
-
Туркия ижтимоий тармоқларда исроил аскарлари турк иссиқ ички кийимларини қабул қилиб олаётгани акс этган видеоёзув бўйича муносабат билдирди. Таъкидланишича, видеодаги кийимлар эски партиядан.
