Филадельфияда Трамп ва Харрис дебати бўлиб ўтди

Филадельфияда АҚШ президентлигига асосий номзодлар Дональд Трамп ва Камала Харрис ўртасида биринчи дебат бўлиб ўтди. Ҳар икки номзод ҳам бир-бирини айблашдан қайтмади, шу билан бирга, дебат давомида АҚШ келажаги, ташқи сиёсий муаммолар ва мамлакат бошқаруви ҳақида баёнотлар берилди. Баҳснинг асосий жиҳатлари:

- Трамп Харрис ғалаба қозонса, АҚШ иккинчи Венесуэлага айланишини башорат қилди

Трамп агар Харрис сайловда ғалаба қозонса, АҚШнинг келажаги қоронғу бўлишини башорат қилиб, мамлакатнинг эҳтимолий ҳолатини Венесуэла билан солиштирди.

- Харрис Трампни Американи «сотганликда» айблади

Вице-президент Трампни сиёсати ва қарорлари учун танқид қилиб, у мамлакат манфаатларини «сотганини» айтди.

- Трамп Украинадаги урушни тугатиш тарафдори 

Трамп Украинадаги можарога чек қўйиш бўйича келишувга эришиш Қўшма Штатлар манфаатларига мос келишини айтди.

- Исроил ва Украина ҳақида

2023 йил 7 октябрда ҲАМАСнинг Исроилга ҳужуми ҳақидаги модераторнинг саволига жавоб берар экан, Трамп ўзининг аввалроқ айтган гапларини такрорлади: “Агар АҚШ президенти бўлганимда, ҳужум содир бўлмасди”.

У худди шундай баёнот билан Россиянинг Украинага кенг кўламли бостириб кириши ҳақида ҳам гапириб, президентлик курсисида бўлганида, “Россия ҳеч қачон Украинага бостириб кирмаган бўларди”, деди ҳамда Россия президенти Владимир Путин ва Украина президенти Владимир Зеленскийни “яхши билишини” қўшимча қилди.

“Сиз ҳусийлар ва Яман билан боғлиқ вазиятга, Яқин Шарқда бўлаётган воқеаларга қарасангиз, бундай бўлмасди. Мен буни тезда ҳал қилардим. Президент этиб сайлансам, Украина ва Россия ўртасидаги уруш тугайди — мен президент бўлишим биланоқ уни тугатган бўлардим», - дея қўшимча қилди у.

- Харрис Қўшма Штатларни дунёдаги энг кучли армия билан таъминлашга ваъда берди

У Америка армиясини энг ҳалокатли қилиб қўйишига ишонтирди, Трамп эса Қўшма Штатларни "қулаётган давлат" деб атади.

- Ёлғончиликда айблаш

Харрис Трампни беш марта ёлғон гапиришда айблади ва Трамп унга олтита шунга ўхшаш айбловлар билан жавоб қайтарди.

- Трамп Харрисга охирги саволни берди

Трамп мунозарани “Нега энди ҳокимиятда бўлган 3,5 йил ичида сайловчиларга ваъда қилган нарсангизни бажармадингиз?” деган савол билан якунлади, деб хабар бермоқда СНН.

- Харрис дунё етакчилари Трампнинг устидан кулишаётганини айтди

«Дунё етакчилари Дональд Трамп устидан кулмоқда. Мен ҳарбий раҳбарлар билан гаплашдим, уларнинг баъзилари сиз билан ишлаган ва улар сизни “шарманда” деб аташди», — деди Харрис.

- “Путин Трампни тушликка еб қўяди”

«НАТОдаги иттифоқчиларимиз сиз президент эмаслигингиздан жуда миннатдор. Дональд Трамп президент бўлганида, Путин ҳозир Киевда ўтириб, Европанинг қолган қисмига, аввало Польшага кўз тиккан бўларди», — деди Харрис Трампга юзланиб.

Унинг сўзларига кўра, Путин — «Трампни тушликка еб қўядиган диктатор». Ўз навбатида, Трамп Ҳаррисни «тарихдаги энг ёмон вице-президент» деб атади ва у вице-президент сифатида урушнинг олдини ололмаганини айтди.

Дональд Трамп ва Камала Харрис ўртасидаги баҳс ҳар икки номзод ҳам иқтисодиёт, ташқи сиёсат ва миллий хавфсизлик каби муҳим масалаларда ўзларининг қаттиқ позицияларида қолиш ниятида эканликларини яққол кўрсатди. Трамп асосий эътиборни Харрис маъмурияти ва унинг заиф томонларини танқид қилишга қаратди, Харрис эса баҳсдан ўз ютуқларини таъкидлаш ва сайловчиларга Трамп ҳукмронлиги даврини эслатиш учун фойдаланди. Иккала номзод ҳам фаол равишда бир-бирларини айблашди, бу эса баҳсга “зиравор” ва кескинлик қўшди.

Сайлов Қўшма Штатлар келажаги учун муҳим босқич бўлиши аниқ ва баҳс-мунозаралар сайлов пойгасининг шиддатини оширди.