12.08.2025 16:03
93
Жапаров кўпхотинлилик учун жиноий жавобгарликни бекор қилиш тўғрисидаги қонунни рад этди
2025 йил июнь ойида Жогорку Кенеш депутатлари "Қирғизистон Республикаси Жиноят кодексига ўзгартишлар киритиш тўғрисида"ги қонун лойиҳасини уч ўқишда қабул қилди.
Ҳужжатда кўпхотинлилик учун жиноий жавобгарлик белгиланган 176-моддани Жиноят кодексидан чиқариш назарда тутилган эди. Унга кўра, бу ҳолат учун 50 мингдан 100 минг сомгача жарима ёки уч йилгача жамоат ёки тузатиш ишлари белгиланган. Оила кодекси эса фақат бир расман рўйхатга олинган никоҳга рухсат беради.
Қонун лойиҳасининг қабул қилиниши эркакнинг икки ёки ундан ортиқ аёл билан бирга яшаши учун жавобгарликни тўлиқ бекор қилишни англатар эди.
2025 йил 11 август куни Қирғизистон президенти Садир Жапаров қонунни имзолашдан бош тортди ва ўз эътирозлари билан уни парламентга қайтарди.
Унинг айтишича, бу ташаббус мамлакатнинг халқаро мажбуриятларига ва гендер тенглиги тамойилларига зид.
Жапаровга кўра, жиноий жазони сақлаб қолиш давлатнинг қонун устуворлигига содиқлигини намоён этади. Аёллар ва болаларни ҳуқуқий ҳамда ижтимоий тенгсизликдан ҳимоя қилади, оила институтини мустаҳкамлайди.
Президент ўз эътирозларида инсон ҳуқуқлари бўйича вакил, Бош прокуратура, Дин ва миллатлараро муносабатлар бўйича миллий агентлик, Фанлар академияси, Адлия вазирлиги ва Конституциявий суднинг хулосаларига таянган.
Маълумот учун, Қирғизистонда кўпхотинлилик СССР давридан бери тақиқланган: оила қонунчилиги фақат бир расмий никоҳга рухсат беради. ҚР Жиноят кодексининг 176-моддаси икки хотинлилик ва кўпхотинлиликни жиноий жиноят сифатида белгилайди, ва бу модда бўйича иш фақат биринчи хотиннинг аризаси асосида қўзғатилади.
Қирғизистон кўпхотинли никоҳлар учун қаттиқ жазо жорий этган илк МДҲ давлатларидан бири бўлган.
