22.05.2025 12:15
226
СССР ҳалиям мавжуд – Путиннинг маслаҳатчиси
Россия Президенти Владимир Путиннинг маслаҳатчиси Антон Кобяков собиқ Совет Иттифоқи ҳақида баҳсли баёнот билан чиқди. Унга кўра, СССР ҳуқуқий жиҳатдан ҳали ҳам мавжуд. Сабаби иттифоқни тарқатиш тартиби ҳали конституциявий жиҳатдан тўлиқ бажарилмаган.
Куни кеча Санкт-Петербургда ўтказилган халқаро форумда бу ҳақда сўз очган Кобяков СССР 1922 йилда Халқ депутатлари съезди томонидан тузилганини, уни тарқатиш ҳам айнан шу орган томонидан амалга оширилишини таъкидлаган.
Ушбу фикр россиялик ҳуқуқшунослар ва айрим сиёсий гуруҳлар томонидан илгари ҳам такрорланган. Бу орқали Путиннинг пропагандачилари “Беловежск келишуви”ни “ҳуқуқий кучга эга эмас” деб баҳолайди ва СССРнинг тугатилишини тан олмайди.
Жумладан, Кобяковнинг фикрича ҳам гўёки ҳуқуқий томондан қаралса Украинадаги можаро “ички жараён” деб аталиши керак.
“Агар СССР тарқатилмаган бўлса, мантиқан Украина инқирози – бу ички жараёндир”, деган у.
