Қозоғистон ва Озарбайжон ҳарбий разведка соҳасида ҳамкорликни кенгайтирмоқчи

Очиқ юридик ҳужжат лойиҳалари порталида Қозоғистон ва Озарбайжон ҳукуматлари ўртасида ҳарбий разведка соҳасида ҳамкорлик тўғрисидаги битимни тасдиқлаш тўғрисидаги қарор лойиҳаси эълон қилинди, деб ёзади Tengrinews.kz.

Томонлар қуйидаги шаклларда ҳамкорлик қилишга келишиб олган:

ваколатли органлар раҳбарларининг расмий ташрифлари ва экспертларнинг амалий учрашувлари;

мудофаа, террористик ва экстремистик ташкилотлар, ўзаро манфаатли ҳарбий-сиёсий воқеалар йўналишларида ҳарбий разведка маълумотларини ўзаро алмашиш;

томонларнинг ваколатли органларининг шахсий таркиби учун томонлар давлатлари ҳудудларида қўшма жанговар тайёргарлик тадбирларини ўтказиш;

ҳамкорликнинг бошқа шакллари.

«Махфий маълумотларни алмашиш, фойдаланиш ва ҳимоя қилиш махфий маълумотларни ўзаро ҳимоя қилиш тўғрисидаги алоҳида халқаро шартнома асосида амалга оширилади, томонлар ушбу шартнома бўйича ҳамкорлик пайтида олинган маълумотлардан уни тақдим этган томоннинг зарарига фойдаланмайдилар”, дейилади ҳужжатда.

Шунингдек, имзоланган шартнома бўйича мамлакатлар алмашадиган маълумотлар тегишли маълумотларни тақдим этувчи томоннинг ёзма розилигисиз ошкор этилиши, тақдим этилиши ёки учинчи шахсга берилиши мумкин эмаслиги таъкидланган.

“Томонлар бошқа томонга қарши қаратилган ҳарбий разведка фаолиятини амалга оширмайди”, — дейилади ҳужжатда.

Битим томонлардан бирининг “мустақиллиги, суверенитети, ҳудудий яхлитлиги, жамоат тартиби ёки миллий хавфсизлигига таҳдид” юзага келган тақдирда тўхтатилиши мумкин. Агар бу содир бўлса, бошқа томон дипломатик каналлар орқали ёзма равишда хабардор қилиниши керак.

Шартнома 5 йилга тузилган.