22.08.2025 11:31
145
Наманганда 21 нафар ёш йигит-қиз қўлга олинди. Улар террорчилик ғояларини тарғиб қилишда айбланмоқда
Ўзбекистонда диний таълимнинг чекланганлиги кўплаб ёшларнинг турли йўлларга кириб кетишига ҳамда умрини қамоқхона деворлари ортида ўтказишига сабаб бўлмоқда. Инсон фитратидаги динга бўлган эҳтиёж уни ҳар қандай вазиятда ҳақиқатни излашга, Аллоҳга ибодат қилишга ундайди. Буни тушунмаслик ва оммавий диний таълимнинг қонуний йўлларини яратмаслик эса ўзининг салбий оқибатларини юзага келтирмасдан қолмаяпти.
Жумладан, ДХХнинг хабар беришича, Наманганда 21 нафар ёш йигит-қиз қўлга олинган. Улар ижтимоий тармоқларда ноқонуний каналлар очиб, террорчилик ташкилоти ғояларини тарғиб қилувчи материалларни тарқатишда айбланмоқда.
Шунингдек, гуруҳ аъзолари қариндошлари ва маҳалладошларини ҳам ўз сафига жалб этгани айтилмоқда.
Жамоатнинг наманганлик 4 нафар етакчисига нисбатан Жиноят кодексининг 244−1-моддаси (Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) ва 244−2 моддаси (Диний экстремистик, сепаратистик, фундаменталистик ёки бошқа тақиқланган ташкилотлар тузиш, уларга раҳбарлик қилиш, уларда иштирок этиш) билан жиноят иши қўзғатилган.
