Марказий Осиё разведка хизматлари раҳбарлари Фарғонада учрашди
6 май куни Фарғонада Қирғизистон Миллий хавфсизлик давлат қўмитаси раиси Қамчибек Ташийев, Тожикистон Миллий хавфсизлик давлат қўмитаси раиси Саймўмин Ятимов ва Ўзбекистон Давлат хавфсизлик хизмати раиси Aбдусалом Aзизов ўртасида учрашув бўлиб ўтди. 

Қирғизистон Миллий хавфсизлик давлат қўмитаси матбуот хизмати хабарига кўра, томонлар ўзаро ҳамкорликнинг долзарб масалаларини, жумладан, терроризм, экстремизм, наркотик моддаларнинг ноқонуний айланиши, ноқонуний миграция ва контрабанда, шунингдек, бошқа трансчегаравий таҳдид ва таҳдидларга қарши курашни муҳокама қилган.

Шунингдек, трансчегаравий ҳамкорлик ва мамлакатлар ўртасида яхши қўшничилик муносабатларини ривожлантириш учун қулай шароитлар яратиш бўйича умумий саъй-ҳаракатлар масалалари  кўриб чиқилди.

Бундан ташқари, учрашувда Қирғизистон ва Тожикистон ўртасидаги давлат чегараларини делимитация қилиш, Ўзбекистон ва Қирғизистон ўртасидаги чегарани белгилаш масалалари муҳокама қилинди.

“Учрашув иштирокчилари қирғиз-тожик чегараларини делимитация қилиш ва ўзбек-қирғиз давлат чегараларини демаркация қилиш жараёнларини жадаллаштириш бўйича келишувларга эришдилар ҳамда томонларнинг ўзаро манфаатларидан келиб чиққан ҳолда ушбу масалаларни ҳал этиш бўйича амалий чора-тадбирлар белгилаб олинди”, дейилади хабарда.

Қирғизистон ва Тожикистон ўртасидаги қарийб 972 км чегаранинг 889 км участка бўйича келишувга эришилган бўлиб, бу умумий чегара узунлигининг 90 фоизини ташкил этади. Ҳозирда ҳукуматлараро делегациялар қолган 83 км.ни тасдиқлаш масаласини кўриб чиқишмоқда.

Мавзуга алоқадор

Энг кўп ўқилган

Тавсия қилинган

Реклама