Афғонистон Қирғизистоннинг ҳалол маҳсулотлари ҳамда сайёҳлик хизматларига қизиқяпти

Қирғизистонга ташриф буюрган Афғонистон савдо ва саноат вазири Нуриддин Азизий бошчилигидаги делегация мамлакатда ривожланиб бораётган ҳалол индустрия маҳсулотлари билан таништирилди.

Жумладан, меҳмонлар Қирғиз Республикасида халқаро "Ҳалол" стандартларига мос ишлаб чиқаришга эга заводлар фаолияти билан танишди, дейилади хабарда. Хусусан, афғон делегацияси Балиқчи шаҳридаги қушхона ва "Ҳалол егулик" ишлаб чиқариш корхонасини кўздан кечиришган.

Муҳокама қилинган истиқболли йўналишлар орасида қўшма иқтисодий лойиҳалар, Афғонистон фуқаролари учун "Ҳалол" туризм йўналишларини ривожлантириш ҳамда Қирғизистоннинг халқаро стандартларга жавоб берадиган озиқ-овқат маҳсулотларини импорт қилиш масалалари ҳам ўрин олган.