ЖССТ Марбург геморрагик безгаги эпидемияси хавфи ҳақида хабар берди

ЖССТ маълумотларига кўра, бугунги кунга қадар Руандада Марбург геморрагик безгаги билан касалланган 26 та ҳолат аниқланган ва 9 киши вафот этган. Беморларнинг 70 фоизи Кигали шаҳридаги иккита касалхонада тиббиёт ходимларидир. Расмийлар вирус билан алоқада бўлган 300 га яқин одамни аниқлади. Уларнинг барчаси кузатув остида.

"Марбург безгагининг трансчегаравий тарқалиш хавфи мавжуд, чунки касаллик Руанданинг Конго Демократик Республикаси, Танзания ва Уганда билан чегарадош ҳудудларида аниқланган", - дейилади ташкилот баёнотида. ЖССТ ушбу уч давлат расмийларидан Руанда билан чегарада эпидемиологик назорат учун қўшимча чоралар кўришни талаб қилди.

Германияда ҳам Марбург вируси билан касалланиш ҳолатлари аниқлангани айтилмоқда. Гамбург марказий вокзалидан ушбу грипп аломатлари сезилган икки йўловчи зудлик билан эвакуация қилинди. dpa агентлигининг хабар беришича, 2 октябрь, сешанба куни касаллик аломатларини сезган тиббиёт талабаси ва унинг севгилиси навбатдаги тиббий кўрикдан ўтиш учун Гамбург-Эппендорф университети касалхонасига олиб кетилган.

Қайд этилишича, улардан бири аввалроқ Руандага борган ва у ерда шифокорлар кейинчалик Марбург вируси билан касалланган деб ташхис қўйган бемор билан мулоқотда бўлган.

Дастлабки маълумотларга кўра, поездда яна 200 га яқин йўловчи бўлган. Полиция зарурат туғилган тақдирда карантинга олиш учун уларнинг маълумотларини тўплаб қўйган.

Марбург вируси Эбола вируси билан бир оилага мансуб бўлиб, ўлим даражаси 88% га етиши мумкин. "27 дан ортиқ ҳолат ва тўққизта ўлим билан эпидемия рекорд даражадаги тўртинчи ўринни эгаллади. ЖССТ ушбу эпидемия хавфини миллий миқёсда жуда юқори, минтақавий миқёсда юқори ва глобал миқёсда паст деб баҳолади", дея хабар бермоқда NPR.

Марбург безгаги эпидемияси охирги марта 2023 йилнинг февраль-июнь ойларида Африкада кузатилиб, Танзания ва Экваториал Гвинеяда тарқалганди. Бунгача Ангола, Гана, Гвинея, Кения ва Жанубий Африкада қайд этилган.

Замонавий тиббиёт Марбург вируси келтириб чиқарадиган касаллик одамларга кўршапалаклардан юқади, деб ҳисоблайди. Кейин у касал одам билан бевосита алоқа қилиш орқали одамлар орасида тарқалади. Касаллик тўсатдан юқори иситма ва кучли бош оғриғи билан бошланади. Етти кун ичида инфекцияланганларда геморрагик иситма белгилари пайдо бўлади.

Марбург иситмасидан ўлим даражаси вируснинг штамми ва даволаш имкониятларига қараб 24% дан 88% гачани ташкил этади. Геморрагик иситманинг бу шаклини даволаш усули ҳали мавжуд эмас. Касаллик ўз номини Германиянинг Марбург шаҳридан олган. У 1967 йилда шаҳарда илк бор қайд этилган. Унинг қўзғатувчиси илмий тадқиқот учун Африкадан олиб келинган маймун тўқималарида топилган.