13.02.2025 07:45
Туркия Суриядан товарлар олиб киришга қўйилган чекловларни бекор қилди
Туркия Савдо вазирлиги Сурия бозорларидан товар ва маҳсулотлар олиб киришга қўйилган чекловларни олиб ташлади. Бу ҳақда Сурия қуруқлик ва денгиз чегара пунктлари бош бошқармаси директори Мазен Алуш маълум қилди.
Алушнинг айтишича, Туркия ва Сурия расмийлари ўртасида олиб борилган музокаралар натижасида Сурия товарларини Туркияга олиб чиқишга қўйилган чекловлар бекор қилинган. Шунингдек, Сурия маҳсулотларини транзит орқали хорижий давлатларга экспорт қилиш учун Туркия ҳудудидан фойдаланиш имконияти яратилган.
Расмий маълумотларга кўра, 2024 йил декабрда Туркиянинг Сурияга экспорти 20 фоизни ташкил қилиб, 2,2 миллиард долларни қайд этган. 2025 йил январида ўсиш 38 фоиздан ошган. Суриядан Туркияга импорт ҳажми эса 437 миллион долларга етган.
Сурияда Асад режимининг тугатилиши ортидан ўрнатилган янги ҳукумат мамлакатда иқтисодий ва бошқа соҳаларни ривожлантириш, халқаро дипломатик алоқаларни ўрнатишга ҳаракат қилмоқда. Йиллар давомида мамлакат иқтисодиёти жарликка юз тутган, халқ очарчиликка маҳкум эди. Давлат бошқаруви издан чиқиб, ўз халқини ҳимоя қилолмайдиган даражага келган.
