Трамп Зеленскийни «сайловларсиз диктатор» деб атади

АҚШ президенти Дональд Трамп Украина президенти Владимир Зеленскийни сайлов ўтказишдан бош тортаётгани учун “сайловларсиз диктатор” деб атади. Шунингдек, Зеленский АҚШни «ғалаба қозониб бўлмайдиган ва бошланиши керак бўлмаган» урушга 350 миллиард доллар сарфлашга «кўндирган»ини иддао қилмоқда.

Трампнинг сўзларига кўра, АҚШ Украинани қўллаб-қувватлаш учун Европадан кўра 200 миллиард кўпроқ маблағ сарфлаган, аммо эвазига ҳеч нарса олмайди. АҚШнинг собиқ президенти Жо Байден бу борада «мувозанатни сақлаш»ни талаб қилмаган.

АҚШ президенти, шунингдек, Зеленскийни «кичиккина муваффақиятга эришган комедиячи» деб атади.

«Ахир бу уруш биздан кўра Европа учун муҳимроқ — бизда тўсиқ сифатида улкан ажойиб океан бор. Бундан ташқари, Зеленский биз унга юборган пулларнинг ярми „йўқолганини“ тан олади. У сайлов ўтказишдан бош тортмоқда, унинг украиналиклар орасида рейтинги жуда паст ва у уддалаган ягона нарсаси — „Байденни скрипка чалгандек чалиш“”

Трамп Зеленский шошилгани маъқуллиги, акс ҳолда унинг мамлакати омон қолмаслигини таъкидлади.

“Айни пайтда Россия билан урушни тугатиш бўйича музокараларни муваффақиятли олиб бормоқдамиз. Буни фақат Трамп ва Трампнинг маъмурияти уддалай олишини ҳамма тан олади. Байден ҳеч қачон уриниб кўрмаган, Европа тинчликка эриша олмаган, Зеленский эса „молиявий оқим“ давом этишини хоҳлаётган бўлиши мумкин. Мен Украинани яхши кўраман, лекин Зеленский буни яхши уддалай олмади, унинг мамлакати вайрон бўлди ва миллионлаб одамлар беҳуда ҳалок бўлди — бу давом этмоқда», — деб ёзди Трамп TruthSocial ижтимоий тармоғида.